ນະຄອນຫລວງວຽງຈັນຈະເຂັ້ມງວດ ຕໍ່ການອະນຸຍາດຮ້ານບັນເທີງ ແລະ ຮ້ານອາຫານ ພ້ອມແກ້ໄຂບັນຫາຕ່າງໆຢ່າງເດັດຂາດ

    0
    65

    ທ່ານນາງ ວິໄລວອນ ຈັນທະລາຕີ ຫົວໜ້າພະແນກຖະແຫລ່ງຂ່າວວັດທະນະທຳ ແລະ ທ່ອງທ່ຽວ ນະຄອນຫລວງວຽງຈັນ ຊີ້ແຈງ ຕໍ່ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນນະຄອນຫລວງ ຊຸດທີ 2 ວັນທີ 13 ມັງກອນ 2023 ຜ່ານມານີ້ວ່າ: ບັນຫາກ່ຽວກັບການອະນຸຍາດຮ້ານບັນເທີງ ຮ້ານອາຫານ ແລະ ຮ້ານກິນດື່ມ ທີ່ຕິດພັນກັບການມົ້ວສຸມ ແລະ ປາກົດການຫຍໍ້ທໍ້ຕ່າງໆໃນສັງຄົມ ໃນຕໍ່ໜ້າພວກເຮົາຕ້ອງໄດ້ສ້າງກົນໄກ ການຄຸ້ມຄອງຕິດຕາມກວດກາ ແລະ ແກ້ໄຂໃຫ້ເປັນລະບົບ ວຽກທີ່ທາງເຮົາຈະຕ້ອງເຮັດມີດັ່ງນີ້:

    ພວກເຮົາຈະເຮັດວຽກກັບເຈົ້າໜ້າທີ່ ແລະ ອຳນາດການປົກຄອງເມືອງ, ບ້ານ ເພື່ອຄວາມເປັນເອກະພາບກັນໃນດ້ານວິທີການແກ້ໄຂ ແລະ ສະເໜີຕໍ່ການປົກຄອງ ເພື່ອຮັບຮອງເອົານິຕິກຳ ແລະ ວິທີການແກ້ໄຂໃຫ້ເປັນລະບົບ.

    ພະແນກ ຖວທ ຈະອອກລະບຽບ-ຂໍ້ກຳນົດ ໂດຍສະເພາະແມ່ນອີງໃສ່ກົດໝາຍມາດຕາທີ 28-29 ຂອງຂໍ້ຫ້າມ ລວມທັງເລື່ອງໂມງເວລາ ຖ້າຮອດ 00:00 ໂມງ ຕ້ອງໄດ້ໃຫ້ປິດ. ນອກນັ້ນ, ຈະໄດ້ເຮັດບົດບັນທຶກກັບບັນດາຜູ້ປະກອບການທຸລະກິດເພື່ອໃຫ້ຮັບຮູ້ຕໍ່ລະບຽບທີ່ອອກ.

    ຈະລົງຈັດສັນກວດກາຄືນໂດຍສົມທົບກັບອົງການປົກຄອງເມືອງໃນການກວດກາຄືນ ກ່ຽວກັບຮ້ານອາຫານ ທີ່ອອກອະນຸຍາດແລ້ວບໍ່ເຄື່ອນໄຫວເປັນຮ້ານອາຫານ ແຕ່ເຄື່ອນໄຫວເປັນຮ້ານບັນເທີງ ເພາະທຸກມື້ນີ້ອອກໜັງສືເປັນຮ້ານອາຫານ ແຕ່ມີການເປີດເພງ ມີສຽງເນືອງນັນສຸດທ້າຍກໍເປັນຮ້ານບັນເທີງ ເຊິ່ງການການດຳເນີນທຸລະກິດບໍ່ຖືກຕ້ອງຕາມການອອກອະນຸຍາດ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.