ຍ້ອນຄວາມຫຶງຫວງ ຄຽດແຄ້ນ ໄປລົມຜູ້ສາວຄົນບ້ານດຽວກັນ ຈຶ່ງເກີດແຮງຈູງໃຈໃຊ້ແກ້ວເບຍຕີຫົວ ຈົນເສຍຊີວິດ

    0
    72

    ຕາມການໃຫ້ຂໍ້ມູນຂອງ ທ່ານ ພັຕ ອານຸສອນ ໄຊດວງຕາ ຮອງຫົວໜ້າພະແນກຕຳຫລວດ ປກສ ເມືອງສິງ ແຂວງຫລວງນ້ຳທາ ໃຫ້ຮູ້ວ່າ: ຕົ້ນເດືອນ ພະຈິກ 2022 ຜ່ານມາ ໄດ້ຮັບແຈ້ງຄວາມຈາກ ທ້າວ ອາເຈ ປະຊາຊົນ ບ້ານມໍນະ ເມືອງສິງວ່າຜູ້ກ່ຽວພ້ອມກັບໝູ່ອີກ 3 ຄົນ ໄດ້ພາກັນໄປຫລິ້ນບຸນທາດຈຽງຕຶງ ແລ້ວພາກັນໄປເຂົ້າຮ້ານບັນເທີງ

    ແຫ່ງໜຶ່ງ ຢູ່ເຂດເທດສະບານເມືອງສິງ. ຂະນະດຽວກັນນັ້ນ, ໄດ້ມີໄວໜຸ່ມກຸ່ມໜຶ່ງໃຊ້ແກ້ວເບຍຕີໃສ່ບໍລິເວນຫົວຂອງໝູ່ຊື່ ທ້າວ ຍືເຄາະ ອາຍຸ 23 ປີ ປະຊາຊົນ ບ້ານມໍນະ

    ເມືອງສິງ ເຈັບສາຫັດ ແລະ ໄດ້ເສຍຊີວິດຢູ່ໂຮງໝໍ ເມືອງສິງ ໃນເວລາ 5 ມື້ ຕໍ່ມາ. ຈາກນັ້ນ, ເຈົ້າໜ້າທີ່ຈຶ່ງໄດ້ລົງເກັບກຳຂໍ້ມູນ ເຫັນວ່າມີມູນຄວາມຈິງ ແລະ ສາມາດກັກຕົວຜູ້ກໍ່ເຫດໄດ້ 1 ຄົນ ມາດຳເນີນການສອບສວນ.

    ຕາມການສືບສວນ-ສອບສວນຂອງເຈົ້າໜ້າທີ່ ທ້າວ ເຈີເປາະ (ຜູ້ກໍ່ເຫດ) ໄດ້ຮັບສາລະພາບວ່າ: ກ່ອນເກີດເຫດຜູ້ກ່ຽວ ແລະ ໝູ່ 2 ຄົນ ໄດ້ໄປສັງສັນກັນຢູ່ຮ້ານບັນເທີງດຽວກັນກັບຄູ່ກໍລະນີ ແລະ ໄດ້ສັ່ງເບຍ 1 ລັງມາດື່ມ. ຮອດເວລາປະມານ 19:00 ໂມງ ຜູ້ກ່ຽວໄດ້ໄປເຂົ້າຫ້ອງນ້ຳ ແລ້ວບັງເອີນພົບເຫັນ ທ້າວ ຍືເຄາະ ທີ່ເປັນຄົນຄຽດແຄ້ນ

    ເກົ່າ ກຳລັງໄປເຂົ້າຫ້ອງນ້ຳເຊັ່ນດຽວກັນ. ຕົນເອງຈຶ່ງໄດ້ຈັບແກ້ວເບຍເປົ່າ 2 ແກ້ວ ຍ່າງນຳຫລັງ. ພໍຮອດຈຸດເກີດເຫດຈຶ່ງໄດ້ລົງມືກໍ່ເຫດໂດຍໃຊ້ແກ້ວເບຍຕີໃສ່ບໍລິເວນຫົວຂອງ ທ້າວ ຍືເຄາະ 1 ບາດ ເຮັດໃຫ້ຜູ້ກ່ຽວລົ້ມລົງກັບພື້ນ. ສ່ວນອີກແກ້ວ 1 ໄດ້ຖິ້ມປະໄວ້ບ່ອນຈຸດເກີດເຫດ. ຈາກນັ້ນ ກໍແລ່ນກັບຄືນມາກິນເບຍກັບໝູ່ ພ້ອມເລົ່າໃຫ້ໝູ່

    ອີກ 2 ຄົນຟັງວ່າຕົນເອງໄດ້ທຳຮ້າຍຮ່າງກາຍຂອງຄົນອື່ນ ອີກປະມານ 10 ນາທີ ກໍໄດ້ແຍກຍ້າຍກັນກັບເຮືອນ. ຜ່ານມາພວກກ່ຽວທັງ 2 ກໍໄດ້ມີເລື່ອງຜິດຖຽງກັນ ສ່ວນແຮງຈູງໃຈທີ່ໃຊ້ແກ້ວເບຍຕີຫົວ ທ້າວ ຍືເຄາະ ຍ້ອນຜູ້ກ່ຽວມີຄວາມຫຶງຫວງ, ຄຽດແຄ້ນ ໃຫ້ ທ້າວ ຍືເຄາະ ທີ່ໄປລົມຜູ້ສາວຄົນບ້ານດຽວກັນກັບຜູ້ກ່ຽວ ແຕ່ປີ 2019.

    ທ່ານ ພັຕ ອານຸສອນ ໄຊດວງຕາ ໃຫ້ຮູ້ຕື່ມວ່າ: ພາຍຫລັງດຳເນີນການສອບສວນເອົາຂໍ້ມູນຫລັກຖານລະອຽດແລ້ວໄດ້ມອບສົບຂອງ ທ້າວ ຍືເຄາະ ໃຫ້ຍາດພີ່ນ້ອງ ນຳໄປສົ່ງສະການຕາມຮີດຄອງປະເພນີ. ສ່ວນທ້າວ ເຈີເປາະ (ຜູ້ຖືກຫາ) ແມ່ນໄດ້ກັກຕົວໄວ້ທີ່ຄ້າຍຄຸມຂັງຊົ່ວຄາວ ກອງບັນຊາການ ປກສ ເມືອງສິງ ເພື່ອສົ່ງສຳນວນສັ່ງຟ້ອງໄອຍະການ ດຳເນີນຄະດີຕາມລະບຽບກົດໝາຍ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.