ຍທຂ ຈະມີມາດຕະການທີ່ເດັດຂາດຕໍ່ວິຊາການທີ່ຄຸ້ມຄອງຕິດຕາມ ໂຄງການທີ່ເຮັດຜິດລະບຽບ

    0
    142

    ໃນອະນາຄົດ, ກະຊວງໂຍທາທິການ ແລະ ຂົນສົ່ງ (ຍທຂ) ຈະມີມາດຕະການທີ່ ເດັດຂາດຕໍ່ກັບພະນັກງານໃນສັງກັດ ແລະ ວິຊາການທີ່ຄຸ້ມຄອງຕິດຕາມ ໂຄງການທີ່ເຮັດຜິດລະບຽບ ເຊັ່ນວ່າ: ໜ້າວຽກໂຄງການບໍ່ຜ່ານກໍໃຫ້ຜ່ານ ແລະ ອື່ນໆ.

    ທ່ານ ວຽງສະຫວັດ ສີພັນດອນ ລັດຖະມົນຕີກະຊວງ ຍທຂ ໄດ້ຊີ້ແຈງໃຫ້ຄວາມກະຈ່າງແຈ້ງ ເມື່ອມໍ່ໆມານີ້ ຕໍ່ຄຳຊັກຖາມຂອງສະມາຊິກສະພາແຫ່ງຊາດທີ່ຕິດພັນກັບການຄຸ້ມຄອງ ແລະ ການຈັດຕັ້ງປະຕິບັດໂຄງການທີ່ເຫັນວ່າຍັງບໍ່ໄປຕາມຂັ້ນຕອນຂອງກົດໝາຍ ແລະ ບໍ່ສອດຄ່ອງກັບຕົວຈິງ ທີ່ກອງປະຊຸມສະໄໝສາມັນເທື່ອທີ 4 ຂອງສະພາ

    ແຫ່ງຊາດຊຸດທີ IX ວ່າ: ກະຊວງ ຍທຂ ມີກົດໝາຍ, ມີລະບຽບການ, ມີມາດຕະຖານເຕັກນິກ, ມີກົນໄກໃນການຄຸ້ມຄອງ ແລະ ການຈັດຕັ້ງປະຕິບັດໂຄງການຢາກວ່າເກືອບຄົບຖ້ວນແລ້ວ ຖ້າແຕ່ລະພາກສ່ວນເອົາໃຈໃສ່ຈັດຕັ້ງປະຕິບັດວຽກງານຕາມໜ້າທີ່ ແລະ ພາລະບົດບາດຂອງຕົນຢ່າງເຄັ່ງຄັດໂຄງການກໍ່ສ້າງກໍຈະມີຄຸນນະພາບແຕ່ມາເບິ່ງ

    ຕົວຈິງແລ້ວແຕ່ລະພາກສ່ວນບໍ່ໄດ້ເຮັດຕາມພາລະບົດບາດຂອງຕົນເຮັດໃຫ້ມີຊ່ອງວ່າງ, ການບັງຄັບໃຊ້ນິຕິກຳຕ່າງໆຍັງບໍ່ທັນເຄັ່ງຄັດ ແລະ ອັນສຳຄັນແມ່ນຈັນຍາບັນຕໍ່ວິຊາຊີບຍັງບໍ່ສູງ ຊຶ່ງຄາດວ່າໃນຕໍ່ໜ້າກະຊວງ ຍທຂ ຈະໄດ້ເອົາໃຈໃສ່ປັບປຸງ ແລະ ສ້າງນິຕິກຳໃຫ້ສອດຄ່ອງກັບສະພາບໃນປັດຈຸບັນເພີ່ມທະວີມາດຕະການກ່ຽວກັບການບັງຄັບໃຊ້ລະບຽບ

    ກົດໝາຍໃຫ້ເຄັ່ງຄັດຂຶ້ນ ພ້ອມດຽວກັນນັ້ນກໍໄດ້ມອບໝາຍໃຫ້ບັນດາກົມທີ່ກ່ຽວຂ້ອງຜັນຂະຫຍາຍນິຕິກຳຕ່າງໆໃຫ້ເປັນນິຕິກຳລຸ່ມກົດໝາຍເພື່ອເປັນເຄື່ອງມືຮັບໃຊ້ໃນການຄຸ້ມຄອງວຽກງານຂະ ແໜງການ, ນອກຈາກນີ້ກະຊວງ ຍທຂ ຈະມີມາດຕະການທີ່ເດັດຂາດຕໍ່ກັບພະນັກງານລັດ, ເວົ້າລວມ,​ ເວົ້າສະເພາະແມ່ນວິຊາການທີ່ຄຸ້ມຄອງຕິດຕາມໂຄງການທີ່ເຮັດຜິດລະບຽບ.

    ທ່ານ ວຽງສະຫວັດ ໄດ້ຊີ້ແຈງຕື່ມວ່າ: ການຄຸ້ມຄອງ ແລະ ຈັດຕັ້ງປະຕິບັດໂຄງການແມ່ນມີ 4 ອົງປະກອບຫຼັກທີ່ຈະຕ້ອງໄດ້ເຮັດວຽກຮ່ວມກັນຕາມພາລະບົດບາດຂອງແຕ່ລະພາກສ່ວນ ຄື: ເຈົ້າຂອງໂຄງການມີໜ້າທີ່ໃນການຊີ້ນໍາຄະນະຮັບຜິດຊອບໂຄງການໃຫ້ຈັດຕັ້ງປະຕິບັດໂຄງການເປັນໄປຕາມແຜນດຳເນີນງານ ແລະ ຮັບປະກັນ

    ຄຸນນະພາບຂອງໂຄງການ; ຄະນະຮັບຜິດຊອບໂຄງການ ຊຶ່ງປະກອບມີຕາງໜ້າເຈົ້າຂອງໂຄງການ, ຂະແໜງການເຕັກນິກ, ຂະແໜງການເງິນ, ຂະແໜງແຜນການເຂົ້າຮ່ວມເປັນຄະນະມີໜ້າທີ່ດຳເນີນຕິດຕາມ, ກວດກາ ແລະ ແກ້ໄຂບັນຫາທີ່ເກີດຂຶ້ນໃນໄລຍະການຈັດຕັ້ງປະຕິບັດໂຄງການ; ທີ່ປຶກສາໂຄງການຕາງໜ້າໃຫ້ໂຄງການໃນການ

    ໃຫ້ຄຳແນະນຳ ແລະ ກວດກາ ເພື່ອໃຫ້ການຈັດຕັ້ງປະຕິບັດໂຄງການຖືກຕ້ອງຕາມເຕັກນິກວິຊາການ; ບໍລິສັດຮັບ ເໝົາກໍ່ສ້າງ ແລະ ບໍລິສັດສຳຫຼວດອອກແບບມີໜ້າທີ່ໃນການກໍ່ສ້າງ ແລະ ສຳຫຼວດອອກແບບໃຫ້ໄດ້ຄຸນນະພາບ ແລະ ຖືກຕ້ອງຕາມມາດຕະຖານເຕັກນິກ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.