ວັນທີ 9 ທັນວາ 2022 ທີ່ຜ່ານມາ ຫ້ອງການອຸດສາຫະກຳ ແລະ ການຄ້ານະຄອນ ໄກສອນພົມວິຫານ ແຂວງສະຫວັນນະເຂດ ໄດ້ທໍາລາຍສິນຄ້າປະເພດເຄື່ອງສຳອາງທີ່ໜົດອາຍຸການນຳໃຊ້ ທີ່ຢຶດໄດ້ໃນງານບຸນນະມັດສະການ ພຣະທາດອີງຮັງ ປະຈຳປີ 2022
ທ່ານ ຄຳສີເພັດ ໄຊຍະວົງ ຫົວໜ້າອຸດສາຫະກໍາ ແລະ ການຄ້ານະຄອນ ລາຍງານໃຫ້ຮູ້ວ່າ: ໃນເວລາ 9:30 ໂມງ ຂອງວັນທີ 6 ທັນວາ 2022 ທີ່ຜ່ານມາ, ທາງເຈົ້າໜ້າທີ່ການຄ້ານະຄອນໄກສອນ ພົມວິຫານ ໄດ້ລົງເຄື່ອນໄຫວຕິດຕາມກວດກາຫ້າງຮ້ານຕ່າງໆ ທັງຮ້ານຂອງຄົນລາວ ແລະ ຊາວຕ່າງປະເທດ ທີ່ເຂົ້າມາວາງຈຳໜ່າຍພາຍໃນງານບຸນນະ
ມັດ ສະການພຣະທາດອີງຮັງປະຈຳປີ 2022 ໂດຍສາມາດກວດຢຶດສິນຄ້າທີ່ໝົດອາຍຸ ບໍ່ສາມາດນໍາໃຊ້ໄດ້ ປະເພດເຄື່ອງສຳອາງຈຳນວນຫຼາຍລາຍການ, ລວມມູນຄ່າທັງໝົດ 15.000 ໂດລາ ພ້ອມນີ້, ເຈົ້າໜ້າທີ່ກໍຍັງໄດ້ເຮັດບົດບັນທຶກປະຕິບັດຕາມລະບຽບຫຼັກການ ຊຶ່ງສິນຄ້າດັ່ງກ່າວນີ້ ແມ່ນບໍ່ມີເອກະສານຢັ້ງຢືນການນຳເຂົ້າ, ບໍ່ໄດ້ຕິດສະຫຼາກ
ສິນຄ້າເປັນພາສາລາວ, ບໍ່ໄດ້ມີການຈົດທະບຽນຈາກຂະແໜງອາຫານ ແລະ ຢາ. ດັ່ງນັ້ນ, ເພື່ອເປັນການປົກປ້ອງຜູ້ບໍລິໂພກ ທາງຫ້ອງການອຸດສາຫະກຳ-ການຄ້ານະຄອນ ຈຶ່ງໄດ້ນຳເອົາສິນຄ້າທັງໝົດນີ້ໄປທຳລາຍຖິ້ມ.
