ລາວ ກຽມສົ່ງອອກ ໝາກມີ້ໄປປະເທດຈີນ ຫລາຍຮ້ອຍໂຕນ ພາຍໃນປີ 2023 ຜ່ານເສັ້ນ ທາງລົດໄຟລາວ-ຈີນ

    0
    540

    ສປປ ລາວ ກຽມສົ່ງອອກ ໝາກມີ້ໄປປະເທດຈີນ 🇨🇳 ຫລາຍຮ້ອຍໂຕນ ພາຍໃນປີ 2023 ຜ່ານເສັ້ນ ທາງລົດໄຟລາວ-ຈີນ ເມື່ອນັກທຸລະກິດຊາວລາວ ໄດ້ປະກາດວ່າຕົນເອງ ໃຊ້ເວລາທຸ້ມເທ, ຢ່າງງຽບໆເກືອບ 4 ປີ ເພື່ອມຸ່ງໝັ້ນພັດທະນາ ເນື້ອທີ່ປູກປະມານ 300 ກວ່າເຮັກຕາ ຈົນເຕີບໃຫຍ່ ແລະ ເຖິງເວລາເກັບກ່ຽວ ໝາກຜົນໄລຍະທໍາອິດ

    ທ່ານ ນາງ ກິ່ງແກ້ວ ຈັນທະ ລັງສີ ນັກທຸລະກິດຍິງ ຜູ້ທີ່ຢືນດ້ວຍ ລໍາແຂ່ງຕົນເອງ ທັງເປັນຜູ້ອໍານວຍການ ບໍລິສັດ ບໍລິຄໍາໄຊ ພັດທະນາ ສົ່ງເສີມກະສິກໍາ ຈໍາກັດໄດ້ໃຫ້ສໍາພາດວ່າ: “ປະເທດລາວ ແມ່ນບ່ອນຝັງສາຍແຮ່ສາຍບື ຂອງບັນພະບູລຸດເຮົາ ແລະ ເປັນແຜ່ນດິນກໍາເນີດ ຂອງຂ້າພະເຈົ້າ ເຊິ່ງມີຄວາມສວຍງາມ, ມີທໍາມະຊາດອັນອຸດົມ

    ສົມບູນ, ມີວັດທະນະທໍາ ຮີດຄອງປະເພອັນດີງາມ, ມີມູນເຊື້ອດຸໝັ່ນ ຂະຫຍັນພຽນ…ຂ້າພະເຈົ້າເອງ ຈະປ່ຽນແຜ່ນດິນຂອງຕົນ ທີ່ມີຢູ່ໃນປັດຈຸບັນ ໃຫ້ກາຍເປັນແຜ່ນດິນເງິນ ແຜ່ນດິນຄໍາ ໃນອະນາຄົດອັນໄກ້ນີ້” ຖ້າເວົ້າຢ້ອນຄືນ ຫລາຍປີຜ່ານມາຕົນເອງ ກໍເຄີຍປູກໝາກກ້ວຍ ໃນພື້ນທີ່ຫລາຍຮ້ອຍເຮັກຕາ ໃນແຂວງບໍລິຄໍາໄຊ ເພື່ອ

    ສົ່ງອອກຈີນ ແລະ ສາມາດສ້າງລາຍໄດ້ ເປັນກອບເປັນກໍາແທ້ ເຊິ່ງໄດ້ປະກອບສ່ວນ ພັດທະນາເສດຖະກິດ-ສັງຄົມຂອງຊາດ, ສ້າງວຽກເຮັດງານທໍາ ໃຫ້ຄົນທ້ອງຖິ່ນຫລາຍຮ້ອຍຊີວິດ, ເປັນໃບໜ້າໃບຕາ ຂອງປະເທດຊາດ ທັງຫລຸດຜ່ອນການນໍາເຂົ້າ ຈາກຕ່າງປະເທດອີກດ້ວຍ. ແຕ່ເຖິງແນວໃດກໍຕາມ ເມື່ອການເວລາຜ່ານໄປນັ້ນ ເງື່ອນໄຂ ແລະ

    ສະພາບກໍ່ປ່ຽນໄປເຊັ່ນກັນ ຍ້ອນຄວາມຕ້ອງການ ຂອງຕະຫລາດ ໃນປະເທດເພື່ອນບ້ານໄກ້ຄຽງ ແລະ ສາກົນບໍ່ຄືເກົ່າ ຈິ່ງໄດ້ຕັດສິນໃຈລຸກໃໝ່ນັ່ງໃໝ່ ເພື່ອຊອກຫາ ຢູ່ຫາກິນ ຕາມຍຸກຕາມສະໄໝຄື ການປັບໂຕໃຫ້ສອດຄ່ອງ ກັບແນວທາງນະໂຍບາຍ ຂອງພັກ-ລັດຖະບານ ໂດຍສະເພາະການພັດທະນາ ສີຂຽວຍືນຍົງ, ຫັນເປັນອຸດສາຫະກໍາ

    ທັນສະໄໝ, ກົນໄກເສດຖະກິດຕະຫລາດ, ຖືເອົາການຜະລິດກະສິກໍາ, ການປູກການລ້ຽງ ເປັນໄມ້ງັດເສດຖະກິດຂອງຊາດ, ເຊື່ອມໂຍງເສດຖະກິດ-ການຄ້າ ດີຈິຕອນໄປຄູ່ຂະໜານ ກັບເສັ້ນທາງລົດໄຟ ລາວ-ຈີນ ພາຍໃຕ້ຂອບການຮ່ວມມື “ ໜຶ່ງແລວ ໜຶ່ງເສັ້ນທາງ” ລະຫວ່າງ ລາວ-ຈີນ ເປັນກຸນແຈສໍາຄັນ ໃນການນໍາເອົາຜົນຜະລິດ ອອກສູ່ ສປ ຈີນ, ອາຊຽນ, ຕາເວັນອອກກາງ, ເອີຣົບ ແລະ ອື່ນໆ.

    ທ່ານ ນາງ ກິ່ງແກ້ວ ຈັນທະ ລັງສີ ເລົ່າສູ່ຟັງແລ້ວຍິ້ມໃສ່ຜູ້ຂຽນ ດ້ວຍຄວາມຫວັງທີ່ສົດໃສວ່າ: ຕົນເອງຄິດຖືກແລ້ວໃນການຕັດສິນໃຈ ຕັດຕົ້ນກ້ວຍຖິ້ມ ແລະ ຢຸດປູກກ້ວຍ ເຖິງແມ່ນມັນຈະສ້າງລາຍໄດ້ ແຕ່ລະປີບໍ່ໜ້ອຍກໍຕາມ ແຕ່ຫາກຄິດແບບວິທະຍາສາດ ແລະ ເບິ່ງກວ້າງແນມໄກນັ້ນ ເຫັນ ວ່າການປູກຖົ່ວລຽນ ແລະ ໝາກມີ້ ຈະເປັນຂຸມຊັບ

    ທີ່ຍືນຍົງ ຍາວນານກວ່າປູກກ້ວຍ ເພາະອາຍຸຂອງມັນ ຈະສາມາດຢູ່ນໍາເຖິງ 30-70 ປີ ໃຫ້ຜົນຜະລິດ, ແນ່ນອນວ່າ ການປູກຖົ່ວລຽນ ແລະ ໝາກມີ້ ອາດລໍາບາກໃນການເບິ່ງແຍງ, ບົວລະບັດ ແລະ ເອົາໃຈໃສ່ເປັນພິເສດ ແຕ່ຫາກເມື່ອມັນໃຫຍ່ຂຶ້ນ ກໍ ບໍ່ຈໍາເປັນ ຕ້ອງເຮັດທຸກຢ່າງ ພຽງແຕ່ເບິ່ງແຍງ ແລະ ຕິດຕາມສັດຕູພືດ, ຫົດນໍ້າ, ໃຫ້

    ຝຸ່ນມັນ, ຕົກແຕ່ງກິ່ງງ່າເທົ່ານັ້ນ ປັດຈຸບັນນີ້ໄດ້ນໍາໃຊ້ ເນື້ອທີ່ທັງໝົດ 300 ກວ່າເຮັກຕາ ໃນນັ້ນປູກໝາກຖົ່ວລຽນ 100 ເຮັກຕາ, ໝາກມີ້ 100 ກວ່າເຮັກຕາ ແລະ ສ່ວນເນື້ອທີ່ເຫລືອ ຍັງສືບຕໍ່ປູກໄປເລື້ອຍໆ. ແຕ່ ໝາກຖົ່ວລຽນ ແລະ ໝາກມີ້ ທີ່ນໍາມາປູກໃນສວນຂອງພວກເຮົາ ໄດ້ເນັ້ນແຕ່ແນວພັນສະເພາະເທົ່ານັ້ນ ຕົວຢ່າງໝາກມີ້ມີ

    2 ຊະນິດ ຄື: ແດງສຸລິຍາ (ໝາກມີ້ຂັ່ງ) ແລະ ທະວາຍປີດຽວ. ສ່ວນໝາກຖົ່ວລຽນ ແມ່ນພັນໝອນທອງ ເທົ່ານັ້ນ ແລະ ຄາດວ່າປີ 2023 ນີ້ຈະສົ່ງອອກໝາກມີ້ ໄປປະເທດຈີນ ກ່ອນໝູ່ ປະມານຫລາຍຮ້ອຍໂຕນ ສ່ວນໝາກຖົ່ວລຽນ ຈະສົ່ງອອກປີ 2025.

    ສະເພາະໝາກມີ້ ທີ່ຈະສົ່ງໄປ ຈີນນີ້ມີ 2 ສາຍພັນຄື ແດງສຸລິຍາ (ເປັນບົວສີຂັ່ງແດງອອກສີສົມຟູ) ແລະ ທະວາຍປີດຽວ (ບົວສີເຫລືອງ ຄ້າຍຄືມ້ອນໄຂ່), ມີນໍ້າໜັກສະເລ່ຍ ລະໜ່ວຍລະ 10-20 ກິໂລຂຶ້ນໄປ ທັງສອງຊະນິດ ມີລົດຊາດສະເພາະ ແຊບອົມນໍ້າເຜີ້ງ, ມັນ, ຫວານ, ນຸ້ມ ແລະ ກອບໆ ເຊິ່ງກາຍເປັນທີ່ນິຍົມ ແລະ ຕ້ອງການບໍລິໂພກຫລາຍທີ່ສຸດໃນຈີນ.

    ດັ່ງທີ່ຮູ້ນໍາກັນ ສປປ ລາວ ແມ່ນໜຶ່ງໃນບັນດາ 10 ປະເທດສະມາຊິກອາຊຽນ ຖືເອົາການຜະລິດ ກະສິກໍາເປັນສິນຄ້າ, ຄໍ້າປະກັນສະບຽງອາຫານ, ການແກ້ໄຂຄວາມທຸກຍາກ ຂອງປະຊາຊົນລາວບັນດາເຜົ່າ ຕາມນະໂຍບາຍຂອງພັກ-ລັດຖະບານ ກ້າວໄປຫາການພັດທະນາ ຍືນຍົງສີຂຽນຮອບ ດ້ານ ໃນນັ້ນ ການປູກກາເຟ, ການປູກໝາກ

    ຖົ່ວລຽນ, ໝາກມີ້ ແລະ ພືດພັນທັນຍາຫານ ພວມໄດ້ຮັບຄວາມສົນໃຈ ແລະ ນິຍົມຈາກອາຊຽນ, ຈີນ, ເອີຣົບ, ຍີ່ປຸ່ນ, ເກົາຫລີ ເຊິ່ງໜຶ່ງໃນຜົນຜະລິດກະສິກໍາ ທີ່ຜູ້ປະກອບການພວມນິຍົມກັນ ປູກຢ່າງກວ້າງຂວາງໃນ ສປປ ລາວ ຄື: ໝາກຖົ່ວລຽນ, ກາ ເຟ, ໝາກມີ້ ເພື່ອສົ່ງອອກ ສປ ຈີນ ປັດຈຸບັນຄາດວ່າ ມີນັກທຸລະກິດລາວ

    ແລະ ນັກລົງທຶນຕ່າງປະເທດ ປູກຖົ່ວລຽນ ໃນເນື້ອທີ່ຫລາຍກວ່າ 3.000 ເຮັກຕາ, ປູກໝາກມີ້ຫລາຍຮ້ອຍເຮັກຕາ, ປູກກ້ວຍພັນເຮັກຕາ ແລະ ອື່ນໆເພື່ອສົ່ງອອກຕ່າງປະເທດ ໂດຍສະເພາະຈີນ.

    ຫວ່າງບໍ່ດົນມານີ້ ກະຊວງແຜນ ການ ແລະ ການລົງທຶນ, ກະຊວງ ກະສິກໍາ ແລະ ປ່າໄມ້ເປີດເຜີຍວ່າ: ມີນັກທຸລະກິດຕ່າງປະເທດ ຈໍານວນບໍ່ໜ້ອຍ ເຂົ້າມາຂໍສໍາປະທານທີ່ດິນ ໃນລາວປະມານ 3.000-5.000 ເຮັກຕາ ເພື່ອປູກຖົ່ວລຽນ ໃນພາກກາງ ແລະ ພາກໃຕ້ຂອງ ສປປ ລາວ.

    ກ່ອນໜ້ານັ້ນ ປະເທດໄທແມ່ນ ອັນດັບທີ 1 ໃນອາຊຽນສົ່ງອອກຖົ່ວລຽນ ໄປຕະຫລາດໂລກ ໂດຍສ່ວນໃຫຍ່ສົ່ງອອກໄປຈີນ, ເກົາຫລີ, ຍີ່ປຸ່ນ, ເອີຣົບ ແຕ່ປັດຈຸບັນນີ້ ລາວ, ຫວຽດນາມ, ກໍາປູເຈຍ, ມາເລເຊຍ ພວມໄດ້ຮັບຄວາມນິຍົມ ປູກໝາກຖົ່ວລຽນ ເພື່ອສົ່ງອອກຕະຫລາດໂລກເຊັ່ນກັນ.

    ໄລຍະທີ່ຜ່ານມາປະເທດລາວ ແມ່ນໄດ້ນໍາເຂົ້າຖົ່ວລຽນ ຈາກປະເທດໄທ ເປັນຈໍານວນບໍ່ໜ້ອຍ ເຊິ່ງເຮັດໃຫ້ເງິນຕາຕ່າງປະເທດ ໄຫລອອກຢ່າງຫລວງຫລາຍ ແລະ ຄາດວ່າປີ 2025 ສປປ ລາວ ຈະເລີ່ມສົ່ງອອກໝາກຖົ່ວລຽນ ໄປຕ່າງປະເທດ ເຊິ່ງຈະເຮັດໃຫ້ລາວ ສາມາດຫລຸດຜ່ອນ ການນໍາ ເຂົ້າ.

    ຊຸມປີຜ່ານມານີ້, ຜູ້ປະກອບ ການລາວ-ຈີນໄດ້ລົງນາມຮ່ວມມືເພື່ອຈັດຊື້ສິນຄ້າກະສິກຳປຸງແຕ່ງ 9 ລາຍການໃຫຍ່ ຈາກ ສປປ ລາວ ສົ່ງໄປ ສປ ຈີນ ປະກອບມີ: 1. ຖົ່ວ ດິນ 1 ແສນໂຕນ 2. ແປ້ງມັນຕົ້ນ 1 ແສນໂຕນ 3. ຊີ້ນງົວແຊ່ແຂງ 1 ແສນໂຕນ 4. ໝາກມ່ວງຫິມະພານ 2 ແສນໂຕນ 5. ໝາກມ່ວງ 1 ແສນໂຕນ 6. ຖົ່ວ

    ລຽນ 5 ໝື່ນໂຕນ 7. ຖົ່ວເຫລືອງ 2 ແສນໂຕນ 8. ກ້ວຍ 1 ແສນໂຕນ 9. ນ້ຳຕານ 5 ແສນໂຕນ ພາຍໃນປີທີ 5 ເປັນຕົ້ນ ໄປ ແມ່ນຈະເລີ່ມສົ່ງອອກ ເຊິ່ງການຮ່ວມມືດັ່ງກ່າວ ຈະເປັນໂຄງການ ທີ່ຈະສ້າງອາຊີບໃຫ້ ແກ່ປະຊາຊົນ ລາວ 5 ແສນຄອບຄົວ ເຮັດໃຫ້ຊີວິດ ການເປັນຢູ່ ຂອງປະຊາຊົນລາວດີຂຶ້ນ.

    ປັດຈຸບັນ, ລາວ-ຈີນ ໄດ້ສຳເລັດ ອະນຸສັນຍາສອງຝ່າຍ ເຊິ່ງສາມາດສົ່ງອອກພືດ ແລະ ຜະລິດຕະພັນພືດ ໄປ ສປ ຈີນ ຫລາຍຊະນິດພືດຄື: ສາລີ, ມັນຕົ້ນ, ກ້ວຍ, ເຂົ້າສານ, ໝາກໂມ, ມັນດ້າງ, ພືດຕະກູນຖົ່ວ ແລະ ອື່ນໆ; ນອກນີ້, ຈີນຍັງເປີດໂອກາດ ໃຫ້ຜູ້ປະກອບການລາວ ສົ່ງອອກສັດ ລ້ຽງເຊັ່ນ: ງົວ ເປັນຕົ້ນ.
    ທີ່ມາ: ຂ່າວສານປະເທດລາວ

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.