ຜ່ານໄປໄວ ວັນທີ 29 ພະຈິກ ຄົບຮອບ 5 ເດືອນ ກັບຄະດີເຈ້ທິບ ທີ່ສັງຄົມຍັງເຝົ້າຕິດຕາມຢ່າງໃກ້ຊິດ

    0
    2699

    ນາງພອນທິບ ຫລື ທີ່ບໍລິວານທຸລະກິດຂອງລາວເອີ້ນວ່າ “ເຈ້ທິບ” ເປັນບຸກຄົນທີ່ໂດ່ງດັງຂຶ້ນມາຈາກການສ້າງພາບຄວາມລວຍຫລອກລວງສັງຄົມ ເປັນຕົ້ນແມ່ນ ສ້າງເຄືອຂ່າຍທຸລະກິດຂາຍອອນລາຍ, ຂາຍເພັດພອຍລາຄາແພງ ແຕ່ເບື້ອງຫລັງ ເປັນແມ່ຫວຍໃຫ້ດອກເບ້ຍ 30% ແຕ່ກໍຕ້ອງສະດຸດ ເມື່ອບໍ່ສາມາດໃຫ້ດອກເບ້ຍແກ່ລູກຫວຍໄດ້

    ຕາມເວລາກໍານົດ ເຮັດໃຫ້ ເຈ້ທິບ ໂຕນໜີຂ້າມໄປໄທໃນວັນທີ 29 ມິຖຸນາ 2022 ແລະ ຖືກເຈົ້າໜ້າທີ່ຈັບໄດ້ ໃນວັນທີ 29 ກໍລະກົດ ແລ້ວຖືກສົ່ງຂ້າມມາດໍາເນີນຄະດີຕາມກົດໝາຍຂອງ ສປປ ລາວ.

    ເຈ້ທິບຖືກສົ່ງມາຝັ່ງລາວໃນວັນທີ 30 ກໍລະກົດ ຈາກນັ້ນເຈົ້າໜ້າທີ່ໄດ້ທໍາການສືບສວນສອບສວນ ແລະ ອອກຖະແຫລງ ວັນທີ 19 ກັນຍາ 2022 ເຖິງຄວາມຄືບໜ້າ ຄະດີ ນາງ ພອນທິບ ພ້ອມພັກພວກ ຕື່ມ 5 ຄົນລວມທັງໝົດ 7 ຄົນ ທີ່ມີການເຄື່ອນໄຫວສໍ້ໂກງເງິນ ປະຊາຊົນໃນຂອບເຂດທົ່ວປະເທດ ມີຜູ້ເສຍຫາຍຫຼາຍກວ່າ 1.600 ຄົນ

    ແລະ ມີຜົນເສຍຫາຍເປັນເງິນຫຼາຍຕື້ກີບ ເຈົ້າໜ້າທີ່ຕໍາຫຼວດ ໄດ້ຢຶດ ແລະ ອາຍັດຊັບສິນທີ່ໄດ້ຈາກການກະທໍາຜິດ ເປັນຕົ້ນແມ່ນ: ເຮືອນ, ລົດ, ທີ່ດິນ ແລະ ເຄື່ອງປະດັບຄ້າຍຄືເພັດ ຈໍານວນຫຼາຍລາຍການ.

    ຄະດີເຈ້ທິບ ຖືກຈັດຢູ່ໃນອັນດັບຄະດີດັງທີ່ເກີດຂຶ້ນຢູ່ໃນລາວ ກ່ຽວກັບການສ້າງພາບຄວາມລໍ້າລວຍຫລອກລວງສັງຄົມ ສ້າງຄວາມເສຍຫາຍມະຫາສານແກ່ປະເທດຊາດ ນີ້ຄືສາເຫດທີ່ສັງຄົມຈ້ອງຈັບຕາ ແລະ ເຝົ້າຕິດຕາມຢ່າງໃກ້ຊິດ ເພື່ອຢາກຮູ້ຄວາມເຄື່ອນໄຫວ ຄວາມເປັນໄປມາຂອງຄະດີດັ່ງກ່າວ.

    ນັບຈາກມື້ທີ່ເຈ້ທິບໂຕນໜີໄປໄທ ໃນວັນທີ 29 ມິຖຸນາ ມາຈົນເຖິງ ວັນທີ 29 ພະຈິກ 2022 ນີ້ ແມ່ນຄົບຮອບ 5 ເດືອນພໍດີ ແຕ່ສັງຄົມລາວກໍຍັງບໍ່ໄດ້ລືມຄະດີດັ່ງກ່າວໄດ້ເທື່ອ ພ້ອມທັງເຝົ້າຕິດຕາມການລາຍງານຈາກເຈົ້າໜ້າທີ່ເປັນໄລຍະ ແລະ ໂຈດຖາມກັນເລື້ອຍໆມາ.

    ຫລ້າສຸດ ວັນທີ 28 ພະຈິກ 2022 ນີ້ ມີກະແສຊຸບຊິບກັນໃນໂລກອອນລາຍວ່າ ເຈ້ທິບ ຖືກປ່ອຍຕົວຊົ່ວຄາວ ຍ້ອນຜູ້ກ່ຽວຢູ່ໃນລະຫວ່າງການຖືພາ.
    ເຖິງຢ່າງໃດກໍຕາມ ຂ່າວໃນອອນລາຍ ຍັງບໍ່ມີຄວາມແນ່ນອນ ແລະ ບໍ່ມີໃຜເຊື່ອໄດ້ ເຊິ່ງອາດເປັນພຽງຂ່າວລືເທົ່ານັ້ນ ທຸກໆຄົນກໍຍັງລໍຖ້າການຖະແຫລງຢ່າງເປັນທາງການຈາກເຈົ້າໜ້າທີ່ທີ່ກ່ຽວຂ້ອງ.

    ຫາກມີຄວາມຄືບໜ້າ ຫລື ມີຂໍ້ມູນລາຍລະອຽດທີ່ໜ້າເຊື່ອຖືໄດ້ ທີມງານຂ່າວໜັງສືພິມລາວພັດທະນາ ຈະມານຳສະເໜີໃຫ້ທ່ານໄດ້ຮັບຊາບຢ່າງທັນການ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.