ກຽມພ້ອມ 100% ໝັ້ນໃຈວ່າ ເຮືອນພັກ ແລະ ໂຮງແຮມ ສາມາດຮອງຮັບແຂກທັງພາຍໃນ ແລະ ຕ່າງປະເທດພຽງພໍ

    0
    86

    ທ່ານ ສີວິໄລ ແສງຈະເລີນ ຮອງເຈົ້າແຂວງຊຽງຂວາງ ລາຍງານໃຫ້ຮູ້ໃນວັນທີ 11 ພະຈິກ 2022 ຜ່ານມານີ້ວ່າ: ມາຮອດປັດຈຸບັນ ແຂວງຊຽງຂວາງ ໄດ້ມີຄວາມພ້ອມໃນທຸກດ້ານ ໃນການເປັນເຈົ້າພາບຈັດງານມະຫະກຳກິລາແຫ່ງຊາດ ຄັ້ງທີ XI ເປັນຕົ້ນສະໜາມຮັບໃຊ້ການແຂ່ງຂັນກິລາ ແມ່ນມີຄວາມພ້ອມຈັດການແຂ່ງຂັນ 100% ຊຶ່ງມີທັງໝົດ 5 ຈຸດຄື:

    ສະໜາມທົ່ງໄຫຫີນ (ເປັນສະໜາມເປີດ-ປິດ ການແຂ່ງຂັນ), ສະໜາມໄຊຊະນະ (ບ້ານໂພນມີໄຊ); ສະໜາມວິທະຍາໄລຄູຄັງໄຂ ສະໜາມຮົ່ມສວນມອນ (ບ້ານໂງຍ)
    ສະໜາມຍິງປືນ ໂຮງຮຽນນາຍສິບ ປກສ ແຂວງ.

    ພ້ອມນັ້ນ, ແຂວງຍັງໄດ້ແຕ່ງຕັ້ງຄະນະຮັບຜິດຊອບ ໃນການຫ້າງຫາກະກຽມດ້ານສະບຽງອາຫານ, ສະຖານທີ່ພັກເຊົາຂອງບັນດາການນຳຂັ້ນສູງ ທັງພາຍໃນ ແລະ ຕ່າງປະເທດ, ທີ່ພັກຄະນະນໍານັກກິລາແຕ່ລະພາກສ່ວນ, ທີ່ພັກຄູຝຶກ, ນັກກິລາ.

    ນອກນັ້ນ, ຍັງມີເຮືອນພັກ ແລະ ໂຮງແຮມ ໄວ້ຮອງຮັບແຂກທັງພາຍໃນ ແລະ ຕ່າງປະເທດ ໄດ້ຢ່າງພຽງພໍ. ສຳລັບວຽກງານປ້ອງກັນຄວາມສະຫງົບ ໄດ້ນຳກຳລັງປ້ອງກັນຊາດ, ປ້ອງກັນຄວາມສະຫງົບລົງຮາກຖານທ້ອງຖິ່ນບ້ານ, ກຸ່ມບ້ານ, ຈັນສັນເວນຍາມຕາມເສັ້ນທາງເຂົ້າ-ອອກ ແຂວງຊຽງຂວາງທຸກທິດທາງ, ພ້ອມບັນດາຈຸດແຂ່ງຂັນ

    ແລະ ທີ່ພັກນັກກິລາແຕ່ລະແຫ່ງ, ໄດ້ມອບໝາຍໃຫ້ບັນດາເມືອງທົ່ວແຂວງ ແລະ ປກສ, ປກຊ ບ້ານ ຈັດຕັ້ງເວນຍາມຮັກສາຄວາມສະຫງົບ, ຄວາມປອດໄພຮອບດ້ານຢູ່ຕາມສາຍທາງຕ່າງໆ.

    ງານມະຫະກຳກິລາແຫ່ງຊາດ ໃນຄັ້ງນີ້, ແຂວງຊຽງຂວາງ ໄດ້ສົ່ງນັກກິລາ 25 ປະເພດເຂົ້າຮ່ວມ ປັດຈຸບັນ ທຸກປະເພດກິລາແມ່ນໄດ້ເຂົ້າສູນຝຶກຊ້ອມເລີ່ມແຕ່ ເດືອນກັນຍາເປັນຕົ້ນມາ ຊຶ່ງເຫັນວ່າທັບນັກກິລາແມ່ນມີຄວາມພ້ອມ 100%, ໃນນີ້ ມີຄະນະນໍາ, ຄູຝຶກ ແລະ ນັກກິລາເຂົ້າຮ່ວມທັງໝົດ 576 ຄົນ ຍິງ 209 ຄົນ ແລະ ຄູຝຶກ 63 ຄົນ.

    ສະນັ້ນ, ຈຶ່ງຮຽກຮ້ອງ ໃຫ້ພໍ່ແມ່ປະຊາຊົນພາຍໃນແຂວງຮ່ວມກັນເປັນເຈົ້າພາບທີ່ດີ ເພື່ອຕ້ອນຮັບແຂກທັງພາຍໃນ ແລະ ຕ່າງປະເທດທີ່ຈະເຂົ້າມາ, ພ້ອມທັງເຊີນຊວນນັກ

    ທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມງານມະຫະກຳກິລາແຫ່ງຊາດໃນຄັ້ງນີ້ ດ້ວຍຄວາມມ່ວນຊື່ນ, ນອກຈາກງານມະຫະກຳກິລາແຫ່ງຊາດ ແລ້ວ ແຂວງຊຽງຂວາງຍັງຈະມີງານສົມໂພດພະເຈົ້າອົງຫຼວງ, ງານສະເຫຼີມສະຫຼອງ ໄຫຫີນເປັນມໍລະດົກໂລກ, ງານບຸນກິນຈຽງ ຂອງຊົນເຜົ່າມົ້ງ ແລະ ອື່ນໆ.

    ເຖິງຢ່າງໃດກໍຕາມ ສັງຄົມກໍຍັງສະແດງຄວາມເປັນຫ່ວງເປັນໃຍ ເລື່ອງການບໍລິການດ້ານທີ່ພັກ ເປັນຕົ້ນແມ່ນຂາດການເອົາໃຈໃສ່ການບໍລິການ, ສວຍໂອກາດຂຶ້ນລາຄາ ແລະ ອື່ນໆ

    ດັ່ງນັ້ນ, ຈຶ່ງຝາກເຖິງພາກສ່ວນກ່ຽວຂ້ອງເຂັ້ມງວດກວດກາ, ຈິງຈັງກັບເລື່ອງນີ້ຕື່ມ ເພື່ອເປັນໜ້າເປັນຕາຂອງແຂວງ ແລະ ເພື່ອເປັນແບບຢ່າງແກ່ແຂວງອື່ນໆໃນການຈັດງານມະຫະກຳກິລາແຫ່ງຊາດຄັ້ງໜ້າ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.