ພິທີເປີດການຊ້ອມຮົບຮ່ວມລາວ-ຣັດເຊຍ ລາໂຣ໌ສ 2022 ໄດ້ຈັດຢ່າງເປັນທາງການ 27 ພະຈິກ 2022

    0
    122

    ພິທີເປີດການຊ້ອມຮົບຮ່ວມລາວ-ຣັດເຊຍ “ລາໂຣ໌ສ 2022” ໄດ້ຈັດຢ່າງເປັນທາງການວັນທີ 27 ພະຈິກ 2022 ນີ້,  ພາຍໃຕ້ຄໍາຂັວນ “ຄຽງບ່າຄຽງໄຫລ່ຕໍ່ສູ້ເພື່ອສັນຕິພາບ ແລະ ຄວາມໝັ້ນຄົງ” ທີ່ແຂວງຊຽງຂວາງ, ໂດຍການເຂົ້າຮ່ວມຂອງສະຫາຍ ພົນຕີ ພັນແສງ ບຸນພັນ ຮອງຫົວໜ້າກົມໃຫຍ່ເສນາທິການກອງທັບ ຮອງຫົວໜ້າຄະນະຊີ້ນໍາ

    ຊ້ອມຮົບຮ່ວມລາວ-ຣັດເຊຍ “ລາໂຣ໌ສ 2022” , ມີສະຫາຍ ພົນຈັດຕະວາ ວາລາດີເມຍ ກູລີກົບ ຮອງຜູ້ບັນຊາການແມ່ທັບ 11 ທະຫານເຂດ-ຕາເວັນອອກ ກອງທັບສະຫາພັນຣັດເຊຍ ຫົວໜ້າຄະນະຊີ້ນໍາຊ້ອມຮົບຮ່ວມ ຣັດເຊຍ-ລາວ “ລາໂຣ໌ສ 2022”, ມີຄະນະຮັບຜິດຊອບຊີ້ນຳຝ່າຍລາວ-ຣັດເຊຍ, ພ້ອມດ້ວຍນາຍ ແລະ ພົນທະຫານກອງທັບປະຊາຊົນລາວ ແລະ ກອງທັບ ສ.ລັດເຊຍເຂົ້າຮ່ວມ.

    ສະຫາຍ ພົນຕີ ພັນແສງ ບຸນພັນ ກ່າວວ່າ: ເພື່ອແນໃສ່ເສີມຂະຫຍາຍສາຍພົວພັນມິດຕະພາບການຮ່ວມມື ລະຫວ່າງສອງຊາດ, ສອງກອງທັບ ແລະ ປະຊາຊົນສອງຊາດ ລາວ-ຣັດເຊຍ, ຣັດເຊຍ-ລາວ, ໃຫ້ນັບມື້ເພີ່ມທະວີຄວາມໜັກແໜ້ນໝັ້ນຄົງທະນົງແກ່ນຍິ່ງໆຂຶ້ນ. ໂດຍສະເພາະແມ່ນການຮ່ວມມືດ້ານການທະຫານ, ສ້າງຄວາມເຊື່ອໝັ້ນ

    ເຊິ່ງກັນ ແລະ ກັນ ແລະ ເພີ່ມທະວີການຊ່ວຍເຫລືອເຊິ່ງກັນ ແລະ ກັນ ໃນໂຂງເຂດວຽກງານປ້ອງກັນຊາດ, ຍົກສູງບົດບາດອະທິປະໄຕສ້າງຄວາມເຂັ້ມແຂງໝັ້ນຄົງ ໃຫ້ແກ່ສອງປະເທດຢູ່ໃນຂົງເຂດພາກພື້ນ ເອີຣົບ-ອາຊີ ແລະ ໃນໂລກ ທັງເປັນຄວາມໝັ້ນຄົງຂອງ ສປປ ລາວ.

    ໂອກາດນີ້, ສະຫາຍ ພົນຈັດຕະວາ ວາລາດີເມຍ ກູລີກົບ ກ່າວວ່າ: ກອງທັບ ລາວ-ຣັດເຊຍ ມີສາຍພົວພັນຮ່ວມມືກັນມາແຕ່ດົນນານແລ້ວ ເຊິ່ງກ້າວເຂົ້າສູ່ລວງເລິກ ແລະ ສືບຕໍ່ຮ່ວມມືກັນແກ້ໄຂບັນຫາສາກົນ ແລະ ສັນຕິພາບຢູ່ໃນພາກພື້ນ. ນອກຈາກການເຄື່ອນໄຫວຫັດແອບ ແລະ ຊ້ອມຮົບຮ່ວມລົດຕັງຍານເກາະລາວ-ລັດເຊຍໃນຄັ້ງນີ້ແລ້ວ,

    ສອງກອງທັບລາວ-ຣັດເຊຍ ຍັງຈະໄດ້ເຄື່ອນໄຫວກິດຈະກຳຮ່ວມກັນ, ເປັນຕົ້ນແມ່ນການແລກປ່ຽນ ວັດທະນະທຳ, ສິນລະປະ-ວັນນະຄະດີ, ກິລາ ແລະ ອື່ນໆ ຮ່ວມກັນ ໃນຮູບແບບ “ສາມັກຄີມິດຕະພາບເຊິ່ງກັນ ແລະ ກັນ” ລະຫວ່າງສອງກອງທັບລາວ-ຣັດເຊຍ ຕະຫລອດຮອດການດຳລົງຊີວິດປະຈຳວັນ, ການແລກປ່ຽນຂໍ້ມູນຂ່າວສານ,

    ແລກປ່ຽນພາສາ ໃຫ້ມີຄວາມເຂົ້າໃຈເຊິ່ງກັນ ແລະ ກັນ ລະຫວ່າງນາຍ-ພົນທະຫານ ສອງກອງທັບ ລາວ-ຣັດເຊຍ, ຣັດເຊຍ-ລາວ ໃຫ້ມີຄວາມສຳພັນ ແລະ ເຂົ້າໃຈກັນເລິກເຊິ່ງ, ບົນຈິດໃຈເພີ່ມພູມຄູນສ້າງ ແລະ ສົ່ງເສີມສາຍສໍາພັນໄມຕີຈິດຂອງ ສອງຊາດລາວ-ຣັດເຊຍ, ຣັດເຊຍ-ລາວ ໃຫ້ນັບມື້ຈະເລີນງອກງາມຍິ່ງໆຂຶ້ນ.
    ການຊ້ອມຮົບຮ່ວມລາວ-ຣັດເຊຍ “ລາໂຣ໌ສ 2022” ຈະໄດ້ດຳເນີນໄປເປັນເວລາ 10 ວັນ ແຕ່ວັນທີ 25 ພະຈິກ ຫາ 5 ທັນວາ ຈຶ່ງຈະສໍາເລັດ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.