ສາທາລະນະສຸກ ຮຽກຮ້ອງປະຊາຊົນລາວ ໃຫ້ຕິດຕາມສຸຂະພາບຕົນເອງຫລັງຈາກສະເຫີມສະຫລອງປີໃໝ່

    0
    208

    ກະຊວງສາທາລະນະສຸກ ຮຽກຮ້ອງມາຍັງປະຊາຊົນລາວບັນດາເຜົ່າ ໃຫ້ຕິດຕາມສຸຂະພາບຕົນເອງຢ່າງຕໍ່ເນື່ອງຫລັງຈາກການສໍາເລັດສະເຫີມສະຫລອງສົ່ງທ້າຍປີເກົ່າ ພສ 2564, ຕ້ອນຮັບປີໃໝ່ລາວ ພສ 2565 ເພື່ອປ້ອງກັນພະ ຍາດໂຄວິດ-19 ເຊີ່ງຄາດວ່າຈໍານວນຜູ້ຕິດເຊື້ອໃນແຕ່ລະທ້ອງຖິ່ນທົ່ວປະເທດຈະເພີ່ມຂຶ້ນເປັນຈໍານວນຫລວງຫລາຍ !!! 🔥

    ດຣ ຣັດຕະນະໄຊ ເພັດສຸວັນ, ຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໃຫ້ຮູ້ວ່າ: ເນື່ອງຈາກໄລຍະສະຫລອງປີໃໝ່ລາວປີນີ້ ມີມື້ພັກເປັນທາງການແຕ່ ວັນທີ 13 ເມສາ ຫາ ວັນທີ 17 ເມສາ ເຮັດໃຫ້ຫຼາຍຄົນ ເດີນທາງກັບໄປຖິ່ນຖານບ້ານເກີດ ເພື່ອຮ່ວມກິດຈະກໍາ ແລະ ສະຫລອງປີໃໝ່ກັບຄອບຄົວ ຫລື ຍາດພີ່ນ້ອງ, ຫຼາຍຄົນໃຊ້ເວລາໃນການພັກຜ່ອນຕາມສະຖານທີ່ທ່ອງທ່ຽວທໍາມະຊາດ ຫລື ໄປທ່ອງທ່ຽວບັນດາແຂວງໃນທົ່ວປະເທດ, ລວມເຖີງຍາດເວລາໃນການໄປສົງພະຂໍພອນຕາມວັດວາອາຮາມຕ່າງໆ. ດັ່ງນັ້ນ, ພາຍຫລັງການສະຫລອງປີໃໝ່ລາວ ຄາດຄະເນວ່າຈະມີຜູ້ຕິດເຊື້ອພະຍາດໂຄວິດ-19 ເພີ່ມຂຶ້ນຈໍານວນຫລວງຫລາຍໃນແຕ່ລະແຂວງທົ່ວປະເທດ. ທຸກຄົນຕ້ອງຕິດຕາມສຸຂະພາບ ຫລື ອາການຂອງຕົນ, ຖ້າມີອາການໄຂ້, ໄອ, ຫາຍໃຈຟືດ ຫຼື ຫາຍໃຈບໍ່ສະດວກ, ລວມເຖີງອາການຕ່າງໆ ທີ່ເຂົ້າກັບນິຍາມການຕິດເຊື້ອພະຍາດດັ່ງກ່າວ ໃຫ້ຮີບຮ້ອນໄປກວດຫາເຊື້ອ ຫລື ໄປພົບແພດ ເພື່ອສາມາດຊ່ວຍກອບກູ້ຊິວິດໃຫ້ທັນເວລາຖ້າຫາກມີອາການຮ້າຍແຮງເກີດຂຶ້ນ.

    ​ທ່ານກ່າວເນັ້ນຢໍ້າວ່າ: ຂະແໜງສາທາລະນະສຸກ ສຸດທີ່ເປັນຫ່ວງເປັນໄຍວ່າ ຈໍານວນຜູ້ຕິດເຊື້ອພະຍາດໂຄວິດ-19 ຢູ່ປະເທດເຮົາ ຫລັງຈາກການສະຫອງປີໃໝ່ລາວ ພສ 2565 ຈະເພີ່ມຂຶ້ນເປັນຈໍານວນຫລວງຫລາຍ. ດັ່ງນັ້ນ, ຜູ້ໃດທີ່ສົງໃສວ່າຕິດເຊື້ອພະຍາດດັ່ງກ່າວໃຫ້ໄປກວດຫາເຊື້ອຢູ່ບັນດາສະຖານທີ່ທີ່ຄະນະສະເພາະກິດກໍານົດໄວ້, ໃນນີ້ ສະເພາະຢູ່ບັນດາແຂວງ ສາມາດໄປເກັບຕົວຢ່າງກວດຊອກຫາເຊືື້ອໄດ້ຢູ່ໂຮງໝໍແຂວງ, ໂຮງໝໍເມືອງ ຫຼື ຈຸດກວດເພີ່ມເຕີມທີ່ທາງຄະນະສະເພາະກິດຂອງແຂວງໄດ້ກຳນົດໄວ້, ສ່ວນຢູ່ນະຄອນຫຼວງວຽງຈັນ ສາມາດໄປເກັບຕົວຢ່າງໄດ້ທີ່ໂຮງໝໍສູນກາງ

    (ມະໂຫສົດ,ມິດຕະພາບ, ເສດຖາທິລາດ, ໂຮງໝໍເດັກ, ໂຮງໝໍແມ່ ແລະ ເດັກເກີດໃໝ່, ໂຮງໝໍ103, ໂຮງໝໍ 5 ເມສາ). ນອກຈາກນີ້ ຍັງມີໜ່ວຍກວດເຄື່ອນທີ່ຂອງເມືອງຕື່ມອີກ. ສໍາລັບຜູ້ໃດທີ່ນໍາໃຊ້ເຄື່ອງກວດແບບໄວ (COVID-19 Ag Rapid Dianostic Test ຫຼື ທີ່ເອີ້ນກັນວ່າ ATK ) ເມື່ອຮູ້ຜົນອອກມາວ່າຕິດເຊື້ອໃຫ້ແຈ້ງຕໍ່ຄະນະສະເພາະກິດທີ່ກ່ຽວຂ້ອງໂດຍດ່ວນ ເພື່ອຂຶ້ນທະບຽນໃຫ້ລະອຽດ ແລະ ຂໍຄໍາປຶກສາໃນການປິ່ນປົວຕົນເອງໃຫ້ຖືກຕ້ອງຕາມຫລັກການ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.