ເຮືອນບິນໃນຈີນ ຕົກ 123 ຊີວິດຍັງບໍ່ຮູ້ຊາຕາກຳ

    0
    160

    ເປັນຂ່າວທີ່ໜ້າເສົ້າໂສກຫຼາຍ ມື້ນີ້ມີຍົນລຳໜຶ່ງທີ່ບັນທຸກພີ່ນ້ອງຊາວຈີນ 100 ກວ່າຊີວິດໂຊກຮ້າຍ ຕົກລົງ ແລະເກີດໄຟລຸກໄໝ້ຢ່າງແຮງ ຕອນນີ້ຍັງບໍ່ຮູ້ຊາຕາກຳ. ທ່ານ​ສີ​ຈິ້ນ​ຜິງ​ ປະທານປະເທດຈີນໄດ້ໃຫ້ການ​ຊີ້ນຳ​ຕໍ່​ເຫດ​ການ​ເຮືອບິນ​ຂອງ​ສາຍການບິນ CHINA EASTERN ຕົກ ໂດຍສັ່ງ​ໃຫ້​ຄົ້ນຫາແລະຊ່ວຍເຫຼືອຜູ້ປະສົບເຄາະຮ້າຍ​ຈົນ​ສຸດ​ຄວາມ​ສາມ​າດ ທັງແກ້​ໄຂບັນຫາຕ່າງໆຫຼັງເກີດເຫດຢ່າງເໝາະສົມ.


    ອຸບັດຕິເຫດເຮືອບິນຕົກດັ່ງກ່າວເກີດຂຶ້ນເວ​ລາ 14 ໂມງ 38 ນາ​ທີ​ຂອງວັນ​ທີ 21 ມີ​ນາ​ນີ້, ຖ້ຽວ​ບິນ MU5735 ຂອງ​ສາຍການບິນ CHINA EASTERN ໄດ້ຂາດ​ການ​ຕິດ​ຕໍ່​ກັບ​ພາກພື້ນດິນຢູ່​ເທິງອາກາດຂອງ​ເມືອງອູ​ໂຈ່ວ​ເຂດກວາງ​ຊີ​ຈີນ ແລະ ຕົກລົງເຂດພູດອຍໃນ​ເວ​ລາ​ປະ​ຕິ​ບັດ​ໜ້າ​ທີ່​ການ​ບິນຈາກ​ຄຸນ​ມິງ-ກວາງ​ໂຈ່ວ, ຕາມຂ່າວລາຍງານວ່າ, ຢູ່​ເທິງ​ເຮືອບິນລຳນີ້ມີ​ຜູ້​ໂດຍ​ສານ 123 ຄົນ ແລະ ຈຸ​ບິນ 9 ຄົນ.
    ພາຍຫຼັງ​ເກີດ​ເຫດ​​ເຮືອບິນ​ຕົກ​ແລ້ວ, ທ່ານ​ສີ​ຈິ້ນ​ຜິງ ເລ​ຂາ​ທິ​ການ​ໃຫຍ່​ຄະ​ນະ​ກຳ​ມະ​ການ​ສູນ​ກາງ​ພັກ​ກອມ​ມູ​ນິດ​ຈີນ, ປະ​ທານ​ປະ​ເທດຈີນ​, ປະ​ທານ​ຄະ​ນະ​ກຳ​ມະ​ການ​ການ​ທະ​ຫານ​ສູນ​ກາງ​ຈີນ ໄດ້​ໃຫ້​ຄຳ​ຊີ້​ນໍາໃນ​ທັນ​ທີ ໂດຍສັ່ງ​ໃຫ້ເລີ່ມ​​ປະ​ຕິ​ບັດຕາມ​ກົນ​ໄກ​ຮັບ​ມື​ສຸກ​ເສີນ​ໃນ​ທັນ​ທີ, ອອກ​ແຮງ​ສຸດ​ຂີດເພື່ອຄົ້ນຫາ ແລະຊ່ວຍເຫຼືອຜູ້ປະສົບເຄາະຮ້າຍ ແລະ ແກ້​ໄຂບັນຫາຕ່າງໆທີ່ເກີດຂຶ້ນຕາມມາໃຫ້​ເໝາະ​ສົມ ພ້ອມ​ທັງ​ຄົ້ນຄວ້າ​ຫາ​ສາເຫດຂອງ​ເຫດການ​ເຮືອບິນ​ຕົກ​ເທື່ອນີ້ໂດຍ​ໄວເທົ່າທີ່ຈະໄວໄດ້, ເພີ່ມ​ທະ​ວີ​ການກວດ​ກາໄພອັນຕະລາຍ ທີ່ແຝງຊ້ອນໃນ​ຂົງ​ເຂດ​ການ​ບິນ​ພົນ​ລະ​ເຮືອນ ເພື່ອ​ຮັບ​ປະ​ກັນ​ຄວາມ​ປອດ​ໄພ​ດ້​ານ​ຊີ​ວິດ​ຂອງ​ປະ​ຊາ​ຊົນ​ຢ່າງ​ເດັດ​ຂາດ.
    ອີງ​ຕາມ​ຄຳ​ຊີ້ນໍາ​ຂອງ​ທ່ານ​ສີ​ຈິ້​ນ​ຜິງ, ອົງການການ​ບິນ​ພົນ​ລະ​ເຮືອນ ແລະ ກະຊວງ​ບໍລິຫານ​ຈັດການ​ວຽກ​ງານ​ສຸກ​ເສີນ​ຂອງ​ຈີນ​ໄດ້​ສົ່ງ​ໜ່ວຍ​ງານ​ໄປ​ຊີ້​ນຳ​ແລະ​ເຮັດ​ວຽກ​ຢູ່​ກັບ​ທີ່ ພ້ອມ​ທັງ​ຈັດ​ສົ່ງ​ກຳ​ລັງ​ຊ່ວຍ​ເຫຼືອ​ຢູ່​ເຂດກວາ​ງ​ຊີ ແລະ ແຂວງກວາງ​ຕຸ້ງ​ໄປ​ເຂົ້າ​ຮ່ວມ​ການ​ຊ່ວຍ​ເຫຼືອ​ກັບ​ທີ່. ປັດ​ຈຸ​ບັນ, ການກູ້ໄພຢູ່ສະຖານທີ່ເກີດເຫດ ແລະ ວຽກ​ງານດ້ານຕ່າງໆກ່ຽວກັບ​ເຫດ​ການ​ເຮືອບິນຕົກ ພ້ອມທັງການຄົ້ນຄວ້າ​ຫາ​ສາເຫດ​ພວມ​ດຳ​ເນີນຢູ່.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.