ຄວາມຫັວງໃໝ່ ຢາເມັດປິ່ນປົວໂຄວິດທີ່ຈີນຜະລິດ ປອດໄພ-ຕ້ານທານດີ ໃນການທົດລອງກັບມະນຸດ

    0
    120

    ວີວີ116 (VV116) ເຊິ່ງເປັນຢານິວຄລີໂອໄຊຕ້ານພະຍາດໂຄວິດ-19 ຊະນິດຮັບປະທານຂອງຈີນ ໄດ້ເລີ່ມທົດລອງໃຊ້ໃນຜູ້ຕິດເຊື້ອພະຍາດໂຄວິດ-19 ອາການປານກາງ ແລະ ຮຸນແຮງທົ່ວໂລກ ຫລັງພິສູດວ່າ: ມີຄວາມປອດໄພ ແລະ ຄວາມຕ້ານທານໃນກຸ່ມຄົນສຸຂະພາບແຂງແຮງ.

    ວັນທີ 19 ມີນາ 2022, ສຳນັກຂ່າວຊິນຮົວລາຍງານວ່າ: ຜົນການສຶກສາໃນວາລະສານແອດຕາ ຟາຣ໌ມາຊູຕິກາ ຊິນິກາ (Acta Pharmaceutica Sinica) ລະບຸວ່າ: ຢາເມັດ ວີວີ116 ມີ “ຄວາມປອດໄພ ແລະ ຄວາມສາມາດຕ້ານທານທີ່ໜ້າເພິ່ງພໍໃຈ” ໃນການທົດລອງໄລຍະທີ 1 ຈຳນວນ 3 ຄັ້ງ ເຊິ່ງທົດລອງກັບຜູ້ມີສຸຂະພາບແຂງແຮງດີໃນຊຽງໄຮ້ 86 ຄົນ ລະຫວ່າງເດືອນພະຈິກ 2021 ຈົນເຖິງເດືອນມັງກອນຜ່ານມາ.

    ຂະນະດຽວກັນ, ການທົດລອງກັບມະນຸດໃນໄລຍະທຳອິດຍັງບົ່ງຊີ້ວ່າ: ຢາເມັດ ວີວີ116 ສາມາດດູດຊຶມໄດ້ຢ່າງວ່ອງໄວ ຫລັງຮັບປະທານຂະນະທ້ອງວ່າງ ຫລື ຫລັງອາຫານປົກກະຕິ ໂດຍບໍ່ມີລາຍງານການເສຍຊີວິດ ຫລື ເຫດການບໍ່ເພິ່ງປະສົງຮ້າຍແຮງ.

    ຜູ້ພັດທະນາຢາດັ່ງກ່າວມາຈາກຫລາຍສະຖາບັນໃນສັງກັດສະຖາບັນບັນດິດວິທະຍາສາດຈີນ (CAS), ບໍລິສັດ ຊຽງໄຮ້ ຈັນສິ ໄບໂອໄຊເອນ ຈຳກັດ (Shanghai Junshi Biosciences) ແລະ ບໍລິສັດ ວິກອນວິຕາ ໄລ ໄຊເອນ ຈຳກັດ (Vigonvita Life Sciences) ໃນເມືອງຊູໂຈ.

    ທັງນີ້, ຢາເມັດ ວີວີ116 ໄດ້ຮັບອະນຸມັດການທົດລອງທາງຄລີນິກຄັ້ງທຳອິດໃນອຸດສະເບກິດສະຖານ ແລະ ໄດ້ຮັບອະນຸຍາດໃຫ້ໃຊ້ປິ່ນປົວຜູ້ຕິດເຊື້ອໂຄວິດ-19 ອາການປານກາງເຖິງຮຸນແຮງໃນອຸດສະເບກິດສະຖານ ເມື່ອທ້າຍປີ 2021.

    ຄະນະນັກວິໄຈໃຫ້ຂໍ້ມູນເພີ່ມຕື່ມວ່າ: ເນື່ອງຈາກການທົດລອງໄລຍະທີ 1 ປາກົດຜົນທາງບວກ ຢາດັ່ງກ່າວໄດ້ເຂົ້າສູ່ການທົດລອງໄລຍະທີ 2/3 ໃນທົ່ວໂລກ ເພື່ອປະເມີນປະສິດທິພາບ ແລະ ຄວາມປອດໄພເພີ່ມຕື່ມແລ້ວ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.