ຈີນຕິດໂຄວິດເຖິງເຄິ່ງໝື່ນຄົນຕໍ່ວັນ ລັອກດາວແລ້ວ 11 ພື້ນທີ່ ກະທົບປະຊາຊົນ 45 ລ້ານຄົນ

    0
    152

    ຊາວຈີນຕິດໂຄວິດເພີ່ມຂຶ້ນເລື້ອຍໆ ຈົນຫລ້າສຸດມີຜູ້ຕິດເຊື້ອແຕ່ລະວັນສູງສຸດ 5.000 ແລ້ວ ແລະ ຍັງໃຊ້ວິທີລັອກດາວແບບເກົ່າໆ ເພື່ອຢຸດການແພ່ລະບາດ.

    ວັນທີ 15 ມີນາ 2022, ສຳນັກຂ່າວບລູມເບິກ (Bloomberg) ລາຍງານວ່າ: ທາງການຈີນກວດພົບຈຳນວນຜູ້ຕິດເຊື້ອໂຄວິດ-19 ແຕ່ລະວັນສູງກວ່າ 5.000 ຄົນເປັນຄັ້ງທຳອິດນັບແຕ່ພົ້ນຈາກການລະບາດຮອບທຳອິດ ໂດຍສ່ວນຫລາຍຢູ່ມົນທົນຈີ໋ຫລິນທາງຕາເວັນອອກສຽງເໜືອ ທີ່ມີຊາຍແດນຕິດກັບ ສປປ ເກົາຫລີ ແລະ ຣັດເຊຍ.

    ໂດຍຈີນພົບຜູ້ຕິດເຊື້ອຫລ້າສຸດທັງໝົດ 5.154 ຄົນ ເປັນຜູ້ທີ່ບໍ່ສະແດງອາການ 1.647 ຄົນ. ຕາມລາຍງານຂອງກະຊວງສາທາລະນະສຸກແຫ່ງຊາດ ເຖິງວ່າຈະເປັນຕົວເລກບໍ່ສູງຫລາຍເມື່ອທຽບໃສ່ປະເທດອື່ນໆໃນໂລກ, ແຕ່ສຳລັບຈີນທີ່ພະຍາຍາມກົດຕົວເລກມາຕະຫລອດ 2 ປີຜ່ານມາແລ້ວ ນີ້ຖືເປັນຄວາມລົ້ມເຫລວຂອງນະໂຍບາຍໂຄວິດເປັນສູນຂອງຈີນ.

    ສຳລັບມົນທົນຈີ໋ຫລິນ ມີການພົບຜູ້ຕິດເຊື້ອ 4.000 ກວ່າຄົນ ແລະ ທາງການໄດ້ປະກາດລັອກດາວພາກພື້ນທີ່ມີປະຊາຊົນ 24 ລ້ານຄົນແລ້ວໃນວັນທີ 14 ມີນາຜ່ານມາ.

    ກ່ອນໜ້ານີ້, ຈີນຫາກໍປະກາດລັອກດາວເມືອງເຊິນເຈິ້ນ ເຊິ່ງເປັນສູນກາງດ້ານເຕັກໂນໂລຊີໃນວັນທີ 13 ມີນາ ແລະ ຫລ້າສຸດໄດ້ປະກາດລັອກດາວເມືອງຫລາງຟາງ ທີ່ຢູ່ຕິດກັບນະຄອນຫລວງປັກກິ່ງໃນເຊົ້າວັນທີ 15 ມີນານີ້.

    ປັດຈຸບັນ ເຖິງວ່າເຊື້ອໄວຣັສຈະກາຍພັນມາຫລາຍຄັ້ງ, ແຕ່ຈີນຍັງຕັດສິນໃຈໃຊ້ວິທີເກົ່າແບບດຽວກັບຮັບມືກັບສາຍພັນດັ້ງເດີມ ໂດຍການສັ່ງປິດເມືອງ ແລະ ບັງຄັບໃຫ້ປະຊາຊົນຈຳນວນຫລາຍອອກມາກວດເຊື້ອໃນໄລຍະເວລາອັນສັ້ນ.

    ເຖິງຢ່າງໃດກໍຕາມ, ສຳລັບເມືອງຫລັກໆແລ້ວ ຈີນໄດ້ພະຍາຍາມຫລີກລ່ຽງຈະສັ່ງລັອກດາວທົ່ວເມືອງ ແຕ່ໃຊ້ວິທີປິດສະເພາະພື້ນທີ່ແທນ ເພື່ອຫລີກລ່ຽງຜົນກະທົບທາງເສດຖະກິດ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.