ບໍລິສັດ ອໍາມະຕະຊີຕີ້ລາວມອບເຄື່ອງຊ່ວຍຕ້ານໂ ຄ ວິ ດ-19 ໃຫ້ 2 ພາກສ່ວນ ລວມມູນຄ່າ 300 ລ້ານ

    0
    97

    ໃນຕອນບ່າຍຂອງວັນທີ 14 ມີນາ 2022 ທີ່ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ (ຫຂສພ) ກະຊວງແຜນການ ແລະ ການລົງທຶນ ໄດ້ຈັດພິທີມອບ-ຮັບເຄື່ອງຊ່ວຍເຫຼືອ ອຸປະກອນການແພດ ຈາກ ບໍລິສັດ ອໍາມະຕະ ຊີຕີ້ລາວ ຈໍາກັດຜູ້ດຽວ, ຜູ້ພັດທະນາໂຄງການເມືອງທັນສະໄໝ ແລະ ເປັນມິດຕໍ່ສິ່ງແວດລ້ອມ (AMATA SMART & ECO CITY) ຢູ່ເຂດນາເຕີຍ, ແຂວງຫຼວງນໍ້າທາ ໃຫ້ແກ່ ກະຊວງສາທາລະນະສຸກ ແລະ ອົງການກາແດງລາວ.


    ໂດຍການເຂົ້າຮ່ວມຂອງທ່ານ ນາງ ຄໍາຈັນ ວົງແສນບູນ ຮອງລັດຖະມົນຕີ ກະຊວງແຜນການ ແລະ ການລົງທຶນ, ທ່ານ ພູທອນ ເມືອງປາກ ປະທານ ອົງການກາແດງ ແຫ່ງຊາດລາວ, ທ່ານ ສອນປະເສີດ ດາລາວົງ ຫົວໜ້າ ຫຂສພ, ທ່ານ ວະລົງ ຕັງປະພຶດກຸນ ກຳມະການຜູ້ຈັດການ ບໍລິສັດ ອຳມະຕະ ຊີຕີ້, ທ່ານ ອາລິຍາກອນ ແກ້ວມະນີ ຕາງໜ້າຈາກກະຊວງສາທາລະນະສຸກ ແລະ ພະນັກງານທີ່ກ່ຽວຂ້ອງເຂົ້າຮ່ວມ.

    ການມອບເຄື່ອງຊ່ວຍເຫຼືອໃນຄັ້ງນີ້ແມ່ນອີງຕາມເຈດຈໍານົງຂອງ ບໍລິສັດ ອໍາມະຕະ ຊີຕີ້ລາວ ຈໍາກັດຜູ້ດຽວ ທີ່ຕ້ອງການປະກອບສ່ວນມອບອຸປະກອນປ້ອງກັນສຳລັບແພດໝໍ ທີ່ຈຳເປັນຈຳນວນໜຶ່ງ ໃຫ້ລັດຖະບານ ສປປ ລາວ ໂດຍຜ່ານກະຊວງແຜນການ ແລະ ການລົງທຶນ ເພື່ອນຳໃຊ້ເຂົ້າໃນການສະກັດກັ້ນ ແລະ ຕ້ານໄພ ຂອງພະຍາດ ໂຄວິດ–19 ລວມມູນຄ່າປະມານ 300 ລ້ານກີບ.
    ໃນນັ້ນເຄື່ອງຊ່ວຍເຫຼືອມີທັງໝົດ 206.700 ອັນ ເຊິ່ງມີລາຍລະອຽດດັ່ງນີ້: ໜ້າກາກອານາໄມ ຈຳນວນ 200.000 ອັນ; ໜ້າກາກ N95 ຈຳນວນ 5.000 ອັນ; ຊຸດປ້ອງກັນ (PPE) ຈຳນວນ 1.000 ຊຸດ; ຖົງຫໍ່ສົບ ຈໍານວນ 700 ອັນ.

    ທ່ານ ພູທອນ ເມືອງປາກ ປະທານ ອົງການກາແດງລາວ ໄດ້ກ່າວຂອບໃຈຕໍ່ການມອບເຄື່ອງຊ່ວຍເຫຼືອຈາກບໍລິສັດ ບໍລິສັດ ອຳມະຕະຊີຕີ້ລາວ ຈໍາກັດ ຜູ້ດຽວ ໃນຄັ້ງນີ້, ອົງການກາແດງແຫ່ງຊາດລາວ ສ້າງຕັ້ງຂຶ້ນ 67 ປີ (01/01/1955 – 01/01/2022) ແຕ່ຍັງບໍ່ທັນມີຄວາມເຂັມແຂງເທົ່າທີ່ຄວນ, ຕ້ອງອາໄສຈາກພາກລັດ ແລະ ສັງຄົມ, ອົງການກາແດງລາວ ແມ່ນປະຕິບັດວຽກງານການປະຖົມພະຍາບານ, ການຂົນຂວາຍບໍລິຈາກເລືອດ ແລະ ສະໜອງເລືອດທີ່ປອດໄພໃຫ້ຜູ້ເຈັບເປັນ, ວຽກຮັກສາສຸຂະພາບຂັ້ນຕົ້ນ, ວຽກແມ່ ແລະ ເດັກ, ວຽກໂພຊະນາການ ແລະ ວຽກກູ້ໄພສຸກເສີນຕ່າງໆ.


    ດັ່ງນັ້ນການມອບເຄື່ອງຊ່ວຍເຫຼືອຄັ້ງນີ້ແມ່ນແທດເໝາະກັບສະພາບປະຈຸບັນ ໂດຍສະເພາະແມ່ນຊຸດປ້ອງກັນ PPE ເຊິ່ງອາສາສະໜັກໃນກາແດງ ແມ່ນໄດ້ນຳໃຊ້ເພື່ອໄປຊ່ວຍເຫຼືອ ແລະ ປ້ອງກັນພະຍາດໂຄວິດ-19 ເນື່ອງເຈົ້າໜ້າທີ່ພວກເຮົາໄດ້ໄປສີດຢາຂ້າເຊື້ອຢູ່ຈຸດທີ່ມີຜູ້ຕິດເຊື້ອ ຫຼື ສະຖານທີ່ສາທາລະນະຕາມສະຖານທີ່ຊຸມຊົນສະເໜີມາ ແລະ ໄປແຈກອາຫານໃຫ້ຜູ້ຕິດເຊື້ອຢູ່ໃນສູນຕ່າງໆ ແລະ ວຽກງານອື່ນໆ ທີ່ມີຄວາມສ່ຽງໃນການປະຕິບັດວຽກງານສະກັດກັ້ນພະຍາດໂຄວິດ-19 ດັ່ງນັ້ນຈຶ່ງຂໍສັນຍາວ່າຈະນຳໃຊ້ອຸປະກອນດັ່ງກ່າວໄປນຳໃຊ້ໃຫ້ເກີດຜົນປະໂຫຍດສູງສຸດ.

    ເຊິ່ງເຄື່ອງທີ່ນຳມາມອບໃນຄັ້ງນີ້ແມ່ນແບ່ງອອກເປັນ 2 ພາກສ່ວນຄື: ມອບໃຫ້ອົງການກາແດງແຫ່ງຊາດລາວ ລວມມີ ຖົງຫໍ່ສົບຈຳນວນ 18 ແກັດ ຈຳນວນ 360 ອັນ ແລະ ຊຸດ PPE 13 ແກັດ ຈຳນວນ 520 ຊຸດ ແລະ ມອບໃຫ້ກະຊວງສາທາລະນະສຸກ ຈຳນວນ ຖົງຫໍ່ສົບ 17 ແກັດ ຈຳນວນ 340 ອັນ ແລະ ຊຸດ PPE 480 ຊຸດ. ສ່ວນສະເພາະຜ້າປິດປາກ ຈຳນວນ 200.000 ອັນ; ໜ້າກາກ N95 ຈຳນວນ 5.000 ອັນ ແມ່ນຈະນຳເຂົ້າມາພາຍຫຼັງ ເຊິ່ງປະຈຸບັນຍັງຢູ່ຂັ້ນຕອນການແລ່ນເອກະສານນຳເຂົ້າ ກ່ອນຈະແຈກຢາຍໄປໃຫ້ທັງ 2 ພາກສ່ວນຄົນລະເຄິ່ງ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.