ນະຄອນຫລວງວຽງຈັນ ເພີ່ມຈຸດບໍລິການ ຂຶ້ນທະບຽນ ພາຫະນະ ແລະ ການຂັບຂີ່ ໃຫ້ສະດວກ-ວ່ອງໄວ

    0
    118

    ນະຄອນຫລວງວຽງຈັນ ເພີ່ມຈຸດບໍລິການ ຂຶ້ນທະບຽນ ພາຫະນະ ແລະ ການຂັບຂີ່ ໃຫ້ສະດວກ-ວ່ອງໄວ ຂປລ. ໂດຍເຫັນໄດ້ເຖິງຄວາມສໍາຄັນ ແລະ ຄວາມຈໍາເປັນໃນໄລຍະໃໝ່ ຕໍ່ວຽກງານຂຶ້ນທະບຽນພະຫານະ ແລະ ການຂັບຂີ່, ກອງຄຸ້ມຄອງພາຫະນະ ແລະ ການຂັບຂີ່, ພະແນກໂຍທາທິການ ແລະ ຂົນສົ່ງ ນະຄອນຫລວງວຽງຈັນ ຈຶ່ງໄດ້ຂະຫຍາຍສາຂາ ຢູ່ສາມເມືອງ ຄື: ສາຂາເມືອງຫາດຊາຍຟອງ, ເມືອງໄຊທານີ ແລະ ນາຊາຍທອງ ເພື່ອເປັນການປັບປຸງຍົກລະດັບການບໍລິການໃຫ້ຮັບປະກັນທາງດ້ານວິຊາການ, ທັນສະໄໝ, ວ່ອງໄວ, ໂປ່ງໃສ ແລະ ສາມາດ ບໍລິການປະຊາຊົນກໍຄືສັງຄົມໃຫ້ທົ່ວເຖິງກວ້າງຂວາງ.

    ທ່ານ ໂອໃດ ໄຊສິດ ຮອງຫົວໜ້າກອງຄຸ້ມຄອງພາຫະນະ ແລະ ການຂັບຂີ່, ຫົວໜ້າສາຂາເມືອງຫາດຊາຍຟອງ ໄດ້ໃຫ້ສຳພາດຕໍ່ນັກຂ່າວສຳນັກຂ່າວສານປະເທດລາວ ເມື່ອວັນທີ 28 ກຸມພາ 2022 ນີ້ວ່າ: ອີງຕາມການເຕີບໃຫຍ່ຂະຫຍາຍຕົວທາງດ້ານເສດຖະກິດຂອງ ສປປ ລາວ ນັບມື້ໄດ້ຮັບການພັດທະນາຢ່າງວ່ອງໄວ; ຄຽງຄູ່ກັນນັ້ນ ຍານພາຫະນະເຊິ່ງເປັນປັດໄຈສໍາຄັນ ໃນການຄົມມະນາຄົມຂົນສົ່ງ ກໍນັບມື້ເພີ່ມຂຶ້ນຢ່າງກະໂດດຂັ້ນ. ສະ ນັ້ນ ເພື່ອປະຕິບັດຕາມແນວທາງນະໂຍບາຍຂອງພັກ-ລັດຖະບານ ໃນການປະກອບສ່ວນເຮັດໃຫ້ເສດຖະກິດ-ສັງຄົມ ມີການຂະຫຍາຍຕົວຢ່າງໜັກແໜ້ນຕໍ່ເນື່ອງ ແລະ ການບໍລິການຮັບໃຊ້ສັງຄົມມີຄວາມວ່ອງໄວທັນການ; ຄະນະພັກ, ຄະນະນໍາ ກອງຄຸ້ມຄອງພາຫະນະ ແລະ ການຂັບຂີ່ ນະຄອນຫລວງວຽງຈັນ ຈຶ່ງໄດ້ຄົ້ນຄວ້າ ແລະ ຕົກລົງເປັນເອກະພາບກໍານົດ

    ຄາດໝາຍ ທັງວາງແຜນການເຄື່ອນໄຫວໃນໄລຍະກາງ, ໄລຍະສັ້ນ ໃຫ້ແທດເໝາະກັບຕົວຈິງ ຢ່າງມີວິທະຍາສາດ. ຈາກການກໍານົດຄາດໝາຍ ແລະ ແຜນດັ່ງກ່າວ ແມ່ນໄດ້ຮັບການເຫັນດີສະໜັບສະໜູນຈາກການນໍາພະແນກ ຍທຂ ນະຄອນຫລວງ, ກົມວິຊາການຈາກກະຊວງ ຍທຂ ແລະ ພາກສ່ວນກ່ຽວຂ້ອງເປັນຢ່າງດີ. ຈາກນັ້ນຄະນະກອງຄຸ້ມຄອງ ຈຶ່ງໄດ້ຊີ້ນຳ-ນຳພາ ອ້າຍນ້ອງພະນັກງານ ກອງຄຸ້ມຄອງພາຫະນະ ແລະ ການຂັບຂີ່ ໃຫ້ສືບຕໍ່ຈັດຕັ້ງປະຕິບັດຕົວຈິງ ເພື່ອຈຳກັດປະກົດການຫຍໍ້ທໍໍ້ ທີ່ຕິດພັນກັບວຽກງານຍານພາຫະນະ ແລະ ການຂັບຂີ່ ໃຫ້ນັບມື້ຫລຸດໜ້ອຍຖອຍລົງ.

    ທ່ານ ໂອໃດ ໄຊສິດ ຍັງໄດ້ໃຫ້ຮູ້ວ່າ: ເພື່ອຮັບປະກັນໃຫ້ກອງຄຸ້ມຄອງພາຫະນະ ແລະ ການຂັບຂີ່ ມີຄວາມສະຫງົບປອດໄພ 100%, ຕ້ານ ແລະ ສະກັດກັ້ນປະກົດການຫຍໍ້ທໍ້ດ້ານຕ່າງໆ ຈຶ່ງໄດ້ປັບປຸງສ້າງລະບົບກົນໄກ ປະສານງານ, ແບບແຜນວິທີເຮັດວຽກຢ່າງມີວິທະຍາສາດໃຫ້ດີຂຶ້ນເລື້ອຍໆ ແລະ ຂະຫຍາຍຈຸດບໍລິການຂຶ້ນທະບຽນ, ການກວດກາເຕັກນິກ ທັງຈັດການສອບເສັງການຂັບຂີ່ລົງສູ່ຮາກຖານ ບັນດາເມືອງທີ່ມີເງື່ອນໄຂໃຫ້ໄດ້ 3 ແຫ່ງຄື: ເມືອງໄຊທານີ, ເມືອງໄຊເສດຖາ ແລະ ເມືອງຫາດຊາຍຟອງ ເພື່ອອຳນວຍຄວາມສະດວກໃນການກວດກາເຕັກນິກ, ຂື້ນທະບຽນຍານພາຫະນະ ແລະ ສອບເສັງໃບຂັບຂີ່ໃຫ້ສັງຄົມຢ່າງທົ່ວເຖິງ ແລະ ເປັນເຈົ້າການສ້າງລະ ບົບຖານຂໍ້ມູນກັບພາກສ່ວນທີ່ກ່ຽວຂ້ອງຂອງພາກລັດ ໃນການເຊື່ອມໂຍງການຂື້ນທະບຽນ, ສອບເສັງໃບຂັບຂີ່ ເພື່ອເຮັດໃຫ້ການຄຸ້ມຄອງ, ບໍລິຫານ ແລະ ການບໍລິການ ມີປະສິດທິພາບສູງຂື້້ນ. ພ້ອມທັງນໍາໃຊ້ລະບົບ ICT ເພື່ອຄຸ້ມຄອງຖານຂໍ້ມູນຍານພາຫະນະ ໃຫ້ທັນສະໄໝ ເຊື່ອມໂຍງຂໍ້ມູນຍານພາຫະນະ ແລະ ການຂັບຂີ່ ໃຫ້ເຊື່ອມຈອດກັນໃນຂອບເຂດທົ່ວປະເທດ; ນຳໃຊ້ເຕັກໂນໂລຊີທີ່ທັນສະໄໝກ້າວໜ້າ ເຂົ້າໃນການຄຸ້ມຄອງເກັບລາຍຮັບຕາມກົນໄກປະຕູດຽວ, ການຈ່າຍເງິນຜ່ານລະບົບທະນາຄານ ເພື່ອປ້ອງກັນບໍ່ໃຫ້ລາຍຮັບຕົກເຮ່ຍເສຍຫາຍ.

    ສຳລັບ ຫ້ອງການຄຸ້ມຄອງພາຫະນະ ແລະ ການຂັບຂີ່ ທັງສາມສາຂາ ປະກອບມີ: ຫ້ອງການເຮັດວຽກພະນັກງານ, ຫ້ອງປະຊຸມ, ຫ້ອງລະບົບເກັບກໍາຂໍ້ມູນ(ເຊີເວີ), ຫ້ອງການບໍລິການ, ຫ້ອງລໍຖ້າຂອງແຂກ, ຫ້ອງການອາກອນ, ຫ້ອງການຄັງເງິນ, ຫ້ອງການຊັບສິນນະຄອນຫລວງວຽງຈັນ, ຫ້ອງຕຳຫລວດຕິດປ້າຍ, ມີເສັ້ນທາງ ເພື່ອເຂົ້າກວດກາເຕັກນິກ 3 ຊ່ອງ, ໃນເບື້ອງຕົ້ນແມ່ນຈະໄດ້ເປີດນຳໃຊ້ກ່ອນ 01 ຊ່ອງ ຊຶ່ງໄດ້ປະກອບເຄື່ອງກວດກາເຕັກນິກທັນສະໄໝ ສາມາດໃຫ້ບໍລິການລົດເບົາ, ລົດບັນທຸກ ແລະ ລົດໂດຍສານ. ໃນນັ້ນປະກອບມີເຄື່ອງກວດກາສຽງ, ຄວັນ, ລະບົບໄຟ, ແສງສະຫວ່າງ, ລະບົບເບກ, ຊ່ວງລ່າງ ແລະ ສູນຕັ້ງລໍ້. ອຸປະກອນປະກອບເຂົ້າຢູ່ໃນສູນລ້ວນແຕ່ເປັນເຄື່ອງທີ່ທັນສະໄໝ ແລະ ໄດ້ມາດຕະຖານສາກົນ.
    ຂ່າວ ສົມຫວັງ ພາບ ອ່າຍຄຳ

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.