ຂາຍໝູໄປຕ່າງປະເທດກະທົບທັນທີ ຊິ້ນໝູພາຍໃນແພງຂື້ນ

    0
    154

    ປະຊາຊົນຈົ່ມກັນພື່ມພ່ຳ ພາຍຫຼັງພົບບັນຫາລາຄາຊິ້ນໝູຖີບໂຕສູງຂຶ້ນ ປະຈຸບັນຢູ່ນະຄອນຫຼວງວຽງຈັນຊີ້ນປະເພດໜຶ່ງຈະຕົກຢູ່ປະມານ 50 ພັນກີບຕໍ່ກິໂລ, ຊີ້ນກ້ອນຕິດໜັງ 48 ພັນກີບ ແລະກະດູກກໍ່ຢູ່ໃນລາຄາ 45-48 ພັນກີບ ຖ້າທຽບໃສ່ກ່ອນໜ້ານີ້ແມ່ນແພງຂຶ້ນປະມານ 8-10 ພັນກີບ (ຈາກການອອກຕະຫຼາດຕົວຈີງ).

    ຢ່າງໃດກໍ່ຕາມການແພງຂຶ້ນຂອງລາຄາຊິ້ນນີ້ກໍ່ມີທີ່ມາຂອງມັນ ອີງຕາມການໃຫ້ສຳພາດຂອງທ່ານ ຫລ້າສາຍ ນວນທາສິງ, ຫົວໜ້າພະແນກກະສິກໍາ ແລະ ປ່າໄມ້ນະຄອນຫລວງວຽງຈັນ ຕໍ່ວິທະຍຸກະຈາຍສຽງແຫ່ງຊາດໃຫ້ຮູ້ວ່າ: ສາເຫດທີ່ເຮັດໃຫ້ລາຄາຊີ້ນໝູເໜັງຕີງເພີ່ມຂຶ້ນ ຍ້ອນຄວາມຕ້ອງການບໍລິໂພກຊີ້ນໝູຢູ່ປະເທດໃກ້ຄຽງຍັງບໍພຽງພໍກັບຄວາມຕ້ອງການ ເຮັດໃຫ້ມີການຂາຍໝູຊີ້ນໄປຕ່າງປະເທດ, ຕົ້ນທຶນໃນການຜະລິດຂອງຜູ້ຜະລິດເພີ່ມຂຶ້ນ ເຊັ່ນ: ອາຫານໝູ, ໝູນ້ອຍ, ຄ່າຂົນສົ່ງ, ບວກກັບອັດຕາເງິນເຟີ້, ສະພາບເສດຖະກິດມີການຟື້ນໂຕຫຼັງຈາກການຜ່ອນຜັນມາດຕະການປ້ອງກັນພະຍາດໂດວິດ-19, ມີການເປີດຮ້ານອາຫານ, ທ່ອງທ່ຽວ ແລະ ການຈັດງານຕ່າງໆ ກັບຄືນສູ່ປົກກະຕິ ແຕ່ສະ ພາບການປັບໂຕຂອງການຜະລິດບໍ່ທັນກັບຄວາມຕ້ອງການ.

    ນອກຈາກນີ້ ມີຫລາຍຟາມຢຸດເຊົາການລ້ຽງໝູ ເຮັດໃຫ້ກໍາລັງການຜະລິດບໍ່ເຕັມຄວາມສາມາດຜະລິດ, ມີບໍລິສັດຍ້າຍຖານການຜະລິດໄປຕ່າງແຂວງ ຍ້ອນຄວາມບໍ່ເອກະພາບໃນການຈັດຕັ້ງປະຕິ ບັດລະບຽບ ເຊັ່ນ: ການເກັບອາກອນ, ຄ່າບໍລິການວິຊາການ, ການຄວບຄຸມລາຄາຂາຍຫນ້າຟາມ-ຊີ້ນຢູ່ຕະຫຼາດ, ການຂະຫຍາຍຕົວເມືອງ-ທີ່ຢູ່ອາໄສທີ່ບັບເຂົ້າໃກ້ແຫຼ່ງການຜະລິດ. ພ້ອມດຽວກັນນີ້ກໍ່ມີສ່ວນມາຈາກການລ້ຽງຫມູພໍ່-ແມ່ພັນ ຜະລິດລູກຫມູນ້ອຍ ສະຫນອງໃຫ້ຜູ້ລ້ຽງບໍ່ພຽງພໍກັບການລ້ຽງ ແລະ ການລ້ຽງຫມູຍັງບໍ່ທັນຈັກຕັ້ງເປັນກຸ່ມການຜະລິດຕັ້ງແຕ່ຂອດລ້ຽງຫາຂອດຈໍາຫນ່າຍ.


    ທ່ານ ຫລ້າສາຍ ນວນທາສິງ ໃຫ້ຮູ້ຕື່ມວ່າ: ເພື່ອແກ້ໄຂບັນຫາຊີ້ນໝູທີ່ມີລາຄາແພງ, ພະແນກກະສິກໍາ ແລະ ປ່າໄມ້ນະຄອນຫລວງວຽງຈັນ ພວມສຸມໃສ່ຈັດຕັ້ງປະຕິບັດຫລາຍມາດຕະການ ເປັນຕົ້ນ: ສ້າງຕັ້ງກຸ່ມຜູ້ລ້ຽງ ແລະ ສະ ຫນອງຊີ້ນ ເພື່ອສະດວກໃນການຈັດການຈັດຮອບວຽນ, ແບ່ງສັດສ່ວນ ແລະ ເອກະພາບກັນໃນການຜະລິດ, ການສະຫນອງ ແລະ ລາຄາການຈໍາຫນ່າຍ; ເພີ່ມການລ້ຽງຫມູແມ່ພັນເພີ່ມຂຶ້ນ 3.000 ແມ່ ແລະ ຟື້ນຟູຟາມຫມູຊີ້ນທີ່ເຊົາລ້ຽງກັບມາລ້ຽງຄືນ ໂດຍລັດຕ້ອງມີນະໂຍບາຍສະເພາະ, ລວມເຖີງ ຊຸກຍູ້ໂຮງງານຜະລິດອາຫານສັດໃຫ້ເພີ່ມກໍາລັງການຜະລິດເພີ່ມຂຶ້ນ ໂດຍຕິດພັນກັບການສົ່ງເສີມການຜະລິດວັດຖຸດິບອາຫານສັດ, ການແບ່ງພື້ນທີ່ການຕະຫຼາດໃຫ້ຄົນລາວ 2/3 ໃນນະຄອນຫຼວງວຽງຈັນ ແລະ ອື່ນໆ.


    ຫົວໜ້າພະແນກກະສິກໍາ ແລະ ປ່າໄມ້ນະຄອນຫລວງວຽງຈັນ ໃຫ້ຮູ້ຕື່ມວ່າ: ປີ 2021 ຜ່ານມາ ຄວາມຕ້ອງການຊີ້ນຫມູຢູ່ນະຄອນຫລວງວຽງຈັນ ແມ່ນ 18.478 ໂຕນ ຫລື 284.276 ໂຕ, ສາມາດສະຫນອງໄດ້ 15.802 ໂຕນ ຫລື 243.107 ໂຕ. ສ່ວນປີ 2022 ຄາດວ່າຄວາມຕ້ອງການຊີ້ນຫມູ ປະມານ 19.088 ໂຕນ ຫລື 293.661 ໂຕ ແຕ່ຈະສາມາດສະຫນອງ ໄດ້ປະມານ 15.892 ໂຕນ ຫລື 244.492 ໂຕ.


    ປັດຈຸບັນ ທົ່ວນະຄອນຫລວງວຽງຈັນ ມີຟາມລ້ຽງໝູ 188 ຟາມ ແຕ່ໄດ້ຢຸດເຊົາໄປ 33 ຟາມ ເຮັດໃຫ້ມີ 155 ຟາມທີ່ຍັງສືບຕໍ່ລ້ຽງ ມີໝູທັງໝົດ 126.084 ໂຕ.

    Cr: Lao National Radio

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.