ລາວ ບັນລຸມູນຄ່າການສົ່ງອອກສິນຄ້າກະສິກຳ ກວ່າ 900 ລ້ານໂດລາ

    0
    17

    ປີ 2021 ຜ່ານມາ, ບັນດາຂະແໜງການ ແລະ ທ້ອງຖິ່ນ ໄດ້ເອົາໃຈໃສ່ຊຸກຍູ້ສົ່ງເສີມຫົວໜ່ວຍທຸລະກິດ ແລະ ປະຊາຊົນຜະລິດສິນຄ້າ ແລະ ການບໍລິການຕາມທ່າແຮງຂອງແຕ່ລະທ້ອງຖິ່ນໂດຍໄດ້ເລັ່ງໃສ່ຜະລິດພືດສະບຽງອາຫານເພື່ອບໍລິໂພກພາຍໃນ ແລະ ປ້ອນໂຮງງານອຸດສາຫະກໍາປຸງແຕ່ງ. ຂະນະດຽວກັນກໍໄດ້ສຸມໃສ່ສົ່ງເສີມການປູກພືດ ແລະ ລ້ຽງສັດໃຫຍ່ທີ່ມີໂຄຕາແລ້ວ.

    ການສົ່ງເສີມການຜະລິດກະສິກໍາ ເພື່ອທົດແທນການນໍາເຂົ້າ ແລະ ສົ່ງອອກແມ່ນໜຶ່ງໃນບັນດາວຽກງານຍ່ອຍຂອງວຽກງານຈຸດສຸມທີ 1 ໃນວາລະແຫ່ງຊາດກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ຊຶ່ງຄວາມຄືບໜ້າ ການຈັດຕັ້ງປະຕິບັດວາລະແຫ່ງຊາດດັ່ງກ່າວ ໄດ້ລາຍ​ງານ​ຕໍ່​ກອງ​ປະ​ຊຸມ​ລັດ​ຖະ​ບານ​ເປີດກວ້າງ​ຄັ້ງ​ທີ 2 ​ເມື່ອ​ບໍ່​ດົນ​ມາ​ນີ້ ໄດ້ຊີ້ໃຫ້ເຫັນວ່າ: ການຊຸກຍູ້ການຜະລິດ ແລະ ສົ່ງອອກສິນ ຄ້າກະສິກຳ ປີ 2021 ບັນລຸມູນຄ່າ 905,36 ລ້ານໂດລາ ກວມກວ່າ 82% ຂອງແຜນການປີ ໂດຍສິນ ຄ້າທີ່ສົ່ງອອກຫລາຍກວ່າໝູ່ແມ່ນກ້ວຍ ມູນຄ່າ 225,33 ລ້ານໂດລາ, ຢາງພາລາ 214,37 ລ້ານໂດລາ; ມັນຕົ້ນ 196,58 ລ້ານໂດລາ; ອ້ອຍ 25,43 ລ້ານໂດລາ; ໝາກໂມ 26,33 ລ້ານໂດລາ ແລະ ອື່ນໆ.

    ສໍາລັບສັດ ໄດ້ສົ່ງອອກງົວ-ຄວາຍ 8.100 ກວ່າໂຕ ມູນຄ່າ 33,9 ຕື້ກີບ; ໃນນີ້ສົ່ງສັດໃຫຍ່ອອກໄປ ສ​ປ ຈີນ ຢ່າງເປັນທາງການເປັນເທື່ອທໍາອິດຕາມຂໍ້ກໍານົດເງື່ອນໄຂດ້ານສຸຂະນາໄມທີ່ກະຊວງກະສິກໍາ ແລະ ປ່າໄມ້ ສ​ປ​ປ ລາວ ແລະ ກົມໃຫຍ່ພາສີ ຂອງ ສ​ປ ຈີນ ທີ່ຮ່ວມລົງນາມໃນວັນທີ 30 ເມສາ 2019 ຊຶ່ງແຕ່ວັນທີ 28 ເມສາ 2019-24 ພຶດສະພາ 2021 ສົ່ງອອກ 2.013 ໂຕ (ງົວ 1.992 ໂຕ ແລະ ຄວາຍ 21 ໂຕ) ເຫັນວ່າປະຕິບັດບໍ່ໄດ້ຕາມຄາດໝາຍ 50.000 ໂຕເນື່ອງຈາກການລະບາດຂອງພະຍາດໂຄວິດ-19 ແລະ ເລີ່ມແຕ່ເດືອນເມສາ 2021 ໃນ 7 ແຂວງຂອງລາວ ເກີດການລະບາດຂອງພະຍາດຜິວໜັງ ອັກເສບຕິດຕໍ່ ງົວ-ຄວາຍ ສົ່ງຜົນໃຫ້ກົມໃຫຍ່ພາສີຂອງ ສປ ຈີນ ປະກາດຫ້າມນໍາເຂົ້າງົວ ແລະ ຜະລິດ ຕະພັນກ່ຽວກັບງົວ ຈາກ ສປປ ລາວ.

    ປັດຈຸບັນ, ລາວເຮົາສາມາດຄວບຄຸມການລະບາດພະຍາດສັດດັ່ງກ່າວໄດ້ແລ້ວ ແລະ ໄດ້ລາຍງານຫາ ອົງການພະຍາດສັດສາກົນ ຫລື OIE ເພື່ອໃຫ້ລຶບຊື່ ສປປ ລາວ ອອກຈາກບັນຊີ ປະເທດທີ່ພວມລະບາດພະຍາດດັ່ງກ່າວ ແລະ ກໍຢູ່ໃນຂັ້ນຕອນການເຈລະຈາຄືນການອະນຸຍາດໃຫ້ນໍາເຂົ້າງົວ ຈາກ ສປປ ລາວ ທັງພວມຈັດຕັ້ງປະຕິບັດມາດຕະການຕາມຂໍ້ກໍານົດເງື່ອນໄຂດ້ານສຸຂະນາໄມຕ່າງໆ ທີ່ລາວເຮົາໄດ້ລົງນາມຮ່ວມກັບ ສປ ຈີນ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.