ສ.ເກົາຫລີ ພົບຜູ້ຕິດເຊື້ອໂອມິຄຣອນ ເສຍຊີວິດ 2 ຄົນທຳອິດຂອງປະເທດ

    0
    161

    ສ.ເກົາຫລີ ຢືນຢັນພົບຜູ້ເສຍຊີວິດທີ່ກ່ຽວຂ້ອງກັບໂອມິຄຣອນ 2 ຄົນທຳອິດໃນປະເທດ ເປັນຜູ້ສູງອາຍຸ ຖືກກວດພົບວ່າຕິດເຊື້ອຫລັງເສຍຊີວິດແລ້ວ.ວັນທີ 3 ມັງກອນ 2022 ສຳນັກຂ່າວຍອນຮັບລາຍງານວ່າ: ສ.ເກົາຫລີ ພົບຜູ້ເສຍຊີວິດທີ່ມີການກ່ຽວຂ້ອງກັບໄວຣັສໂຄວິດ-19 ສາຍພັນໂອມິຄຣອນ 2 ຄົນທຳອິດຂອງປະເທດ ໂດຍທັງສອງຖືກກວດພົບວ່າຕິດເຊື້ອພາຍຫລັງເສຍຊີວິດແລ້ວ.

    ຈາກການເປີດເຜີຍຂອງໜ່ວຍງານດ້ານສາທາລະນະສຸກຂອງເມືອງກວາງຈູ ເຊິ່ງເປັນພື້ນທີ່ທີ່ພົບຜູ້ເສຍຊີວິດທັງສອງຄົນ ລະບຸວ່າ: ຜູ້ເສຍຊີວິດທັງສອງມີອາຍຸປະມານ 90 ປີ ແລະ ມີປະຫວັດເຂົ້າຮັບການປິ່ນປົວຢູ່ໂຮງໝໍແຫ່ງໜຶ່ງໃນເມືອງ ໂດຍຄົນທຳອິດເສຍຊີວິດເມື່ອວັນທີ 27 ທັນວາ ກ່ອນໄດ້ຮັບການຢືນຢັນວ່າຕິດເຊື້ອໂອມິຄຣອນ ໃນວັນທີ 30 ທັນວາ, ສ່ວນອີກຄົນໜຶ່ງເສຍຊີວິດໃນວັນທີ 29 ທັນວາ ເຊິ່ງຖືກລະບຸວ່າເປັນຜູ້ຕິດເຊື້ອໂອມິຄຣອນ, ແຕ່ຍັງຢູ່ລະຫວ່າງການສອບສວນວ່າໂອມິຄຣອນເປັນສາເຫດການເສຍຊີວິດໂດຍກົງ ຫລື ບໍ່.

    ສ່ວນສຳນັກຂ່າວຊິນຮົວລາຍງານໂດຍອ້າງການເປີດເຜີຍຂອງສື່ທ້ອງຖິ່ນວ່າ: ຜູ້ເສຍຊີວິດສອງຄົນມີການເຊື່ອມໂຍງກັບການລະບາດເປັນກຸ່ມກ້ອນພາຍໃນໂຮງໝໍຜູ້ສູງອາຍຸ ເຊິ່ງເຮັດໃຫ້ມີຜູ້ຕິດເຊື້ອໄວຣັສທັງໝົດ 21 ຄົນ. ພ້ອມກ່າວວ່າ: ຜູ້ເສຍຊີວິດຄົນທຳອິດສັກວັກຊີນປ້ອງກັນພະຍາດໂຄວິດ-19 ຄົບສອງໂດສໃນທ້າຍເດືອນຕຸລາຜ່ານມາ. ຂະນະທີ່ຄົນທີສອງສັກວັກຊີນຄົບໂດສໃນເດືອນພຶດສະພາ.
    ຂະນະທີ່ສຳນັກງານຄວບຄຸມ ແລະ ປ້ອງກັນພະຍາດເກົາຫລີ (KDCA) ໄດ້ອອກມາເປີດເຜີຍວ່າ: ອັດຕາການແພ່ລະບາດຂອງໄວຣັສໂຄວິດ-19 ເລີ່ມສົ່ງສັນຍານຊ້າລົງເລັກໜ້ອຍໃນໄລຍະຜ່ານມາ ເປັນຜົນມາຈາກການທີ່ລັດຖະບານໄດ້ກຳນົດມາດຕະການຮັກສາໄລຍະຫ່າງທາງສັງຄົມທີ່ເຂັ້ມງວດຂຶ້ນ, ຫ້າມລວມຕົວກັນເກີນ 4 ຄົນທົ່ວປະເທດ, ປະກາດເຄີຟິວນັບແຕ່ເວລາ 21:00 ໂມງ ສຳລັບຮ້ານກາເຟ ແລະ ຮ້ານອາຫານເປັນເວລາ 2 ອາທິດ ໄປຈົນເຖິງວັນທີ 16 ມັງກອນ 2022.

    ທັງນີ້, ສ.ເກົາຫລີ ລາຍງານພົບຜູ້ຕິດເຊື້ອໂຄວິດ-19 ເພີ່ມຂຶ້ນ 3.129 ຄົນໃນວັນທີ 2 ມັງກອນ ຖືເປັນວັນທີ 2 ຕິດຕໍ່ກັນທີ່ພົບຜູ້ຕິດເຊື້ອໃໝ່ຕໍ່າກວ່າຫລັກ 4.000 ຄົນ ສົ່ງຜົນໃຫ້ມີຈຳນວນຜູ້ຕິດເຊື້ອສະສົມໃນປັດຈຸບັນທັງໝົດ 642.207 ຄົນ.

    ສ່ວນຜູ້ຕິດເຊື້ອທີ່ໄດ້ຮັບການຢືນຢັນວ່າຕິດເຊື້ອໄວຣັສສາຍພັນໂອມິຄຣອນເພີ່ມຂຶ້ນ 111 ຄົນ ເຮັດໃຫ້ປັດຈຸບັນ ສ.ເກົາຫລີ ພົບຜູ້ຕິດເຊື້ອໄວຣັສສາຍພັນໃໝ່ລວມແລ້ວ 1.318 ຄົນ ແບ່ງເປັນຜູ້ຕິດເຊື້ອທີ່ເດີນທາງມາຈາກຕ່າງປະເທດ 703 ຄົນ ແລະ ຕິດເຊື້ອພາຍໃນປະເທດ 615 ຄົນ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.