ມາໃໝ່ຮອດແລງມື້ນີ້ ວັກຊິນອີກ 1.900.000 ໂດສ ການຊ່ວຍເຫຼືອຈາກ ສປ ຈີນ

    0
    283

    ຕ້ອງຂອບໃຈອີກຄັ້ງກັບການຊ່ວຍເຫຼືອ ສປປ ລາວຂອງລັດຖະບານ ສປ ຈີນ ທີ່ຫຼ້າສຸດໄດ້ນຳວັກຊິນຕ້ານໂຄວິດຊຸດໃໝ່ 1.900.000 ໂດສ ສົ່ງເຖິງສະໜາມບິນສາກົນວັດໄຕໃນຕອນແລງຂອງວັນທີ 17 ພະຈິກ 2021. ນີ້ເປັນການປະກອບສ່ວນສຳຄັນໃຫ້ລາວເຮົາບັນລຸອັດຕາສ່ວນການສັກວັກຊີນໃຫ້ໄດ້ຫຼາຍທີ່ສຸດ.


    ພິທີມອບ-ຮັບ ຢ່າງເປັນທາງການໄດ້ຈັດຂຶ້ນໃນວັນດຽວກັນ ໂດຍການກ່າວມອບຂອງ ທ່ານ ຈ່ຽງ ຈາຍ ຕຸງ, ເອກອັກຄະລັດຖະທູດ ສປ ຈີນ ປະຈໍາ ສປປ ລາວ ແລະ ກ່າວຮັບໂດຍ ທ່ານ ພັນຄຳ ວິພາວັນ ນາຍົກລັດຖະມົນຕີແຫ່ງ ສປປ ລາວ, ມີບັນດາທ່ານລັດຖະມົນຕີ, ຮອງລັດຖະມົນຕີ, ແຂກຖືກເຊີນທັງສອງຝ່າຍເຂົ້າຮ່ວມເປັນສັກຂີພິຍານ.
    ໃນພິທີ ທ່ານ ພັນຄຳ ວິພາວັນ ໄດ້ຕາງໜ້າໃຫ້ພັກ ແລະ ລັດຖະບານ ລາວ ມາຮັບວັກຊິນ ຈຳນວນ 1.900.000 ໂດສພ້ອມດ້ວຍເຂັມສັກຢາ ທີ່ລັດຖະບານ ສປ ຈີນ ມອບໃຫ້ ສປປ ລາວ ໃນຄັ້ງນີ້ ເຊິ່ງເປັນຄັ້ງທີ 7 ແລ້ວ, ນອກນັ້ນລັດຖະບານ ຈີນ ຍັງໄດ້ແຈ້ງວ່າ ໃນທ້າຍເດືອນພະຈິກນີ້ ຍັງຈະສືບຕໍ່ມອບວັກຊິນເພີ່ມອີກ 7 ແສນໂດສ ແລະ ອຸປະກອນການແພດຈຳນວນໜຶ່ງ ໃຫ້ບັນດາແຂວງພາກເໜືອຂອງລາວ ໂດຍມອບໃຫ້ແຂວງຢູນນານເປັນຜູ້ຈັດຕັ້ງປະຕິບັດ.
    ນັບແຕ່ເກີດການລະບາດຂອງພະຍາດໂຄວິດ-19 ມາ, ສປ ຈີນ ເປັນປະເທດ ທີ່ໃຫ້ການຊ່ວຍເຫຼືອລ້າ, ສະໜອງວັກຊິນໃຫ້ແກ່ລາວຫຼາຍທີ່ສຸດຮອດທ້າຍເດືອນພະຈິກນີ້ ຈະມີຈຳນວນຫຼາຍຍກວ່າ 6.900.000 ໂດສ ເຊິ່ງການຊ່ວຍເຫຼືອເຫຼົ່ານີ້ ມີຄວາມໝາຍຄວາມສໍາຄັນຫຼາຍຕໍ່ ສປປ ລາວ ໃນການຕໍ່ສູ້ກັບສັດຕູໂຕຮ້າຍກາດໂຄວິດທີ່ຍັງສືບຕໍ່ລະບາດນັບມື້ຫຼາຍຂຶ້ນໃນປະເທດເຮົາຢູ່ທຸກວັນນີ້.

    ທ່ານນາຍົກລັດຖະມົນຕີ ກ່າວວ່າຢືນຢັນວ່າ ການຊ່ວຍເຫຼືອວັກຊິນຂອງລັດຖະບານຈີນ ໃຫ້ແກ່ລັດຖະບານລາວ ແມ່ນເປັນການປະກອບສ່ວນທີ່ສຳຄັນຕົ້ນຕໍ ໃຫ້ແກ່ການປະຕິບັດເປົ້າໝາຍດັ່ງກ່າວ ຂອງລັດຖະບານລາວ, ຊຶ່ງໝາກຜົນຂອງການປະຕິບັດບັນລຸເປົ້າໝາຍດັ່ງກ່າວນັ້ນ ຈະເປັນພື້ນຖານອັນສຳຄັນໃຫ້ແກ່ການເປີດປະເທດ ໃນເງື່ອນໄຂທີ່ທັງຮັບປະກັນໄດ້ຊີວິດຂອງປະຊາຊົນບໍ່ໃຫ້ສູນເສຍກັບການກະຕຸ້ນເສດຖະກິດຂອງປະເທດໃຫ້ມີການຟື້ນຕົວ ແລະ ພັດທະນາໃນຕໍ່ໜ້າ.


    ທ່ານ ຈ່ຽງ ຈາຍ ຕຸງ ກ່າວວ່າ: ລັດຖະບານຈີນ ໄດ້ມອບວັກຊິນໃຫ້ແກ່ ສປປ ລາວ ໃນຄັ້ງນີ້ ມີຈຳນວນ 1.900.000 ໂດສ ແລະ ຈະມອບເພີ່ມອີກ 7 ແສນໂດສ ໃຫ້ບັນດາແຂວງພາກເໜືອຂອງລາວ ໂດຍມອບໃຫ້ແຂວງຢູນນານເປັນຜູ້ຈັດຕັ້ງປະຕິບັດ ເຊິ່ງລວມເປັນ 2.500.000 ໂດສ, ການຊ່ວຍເຫຼືອດັ່ງກ່າວນີ້ໄດ້ສະແດງໃຫ້ເຫັນເຖິງຄວາມເປັນຫ່ວງເປັນໄຍຂອງລັດຖະບານຈີນ ຕໍ່ສຸຂະພາບຂອງປະຊາຊົນລາວ ແລະ ຊ່ວຍໃຫ້ລັດຖະບານຊ່ວຍລາວບັນລຸເປົ້າໝາຍການສັກວັກຊິນກັນພະຍາດໂຄວິດ-19 ໃຫ້ພໍ່ແມ່ປະຊາຊົນພາຍໃນປະເທດນຳອີກ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.