ການກໍ່ສ້າງຂົວນໍ້າພະນາຍ 3 ໃກ້ຈະສໍາເລັດ ແລະ ເປີດນໍາໃຊ້ໃນໄວໆນີ້

    0
    162

    ການກໍ່ສ້າງຂົວນໍ້າພະນາຍ 3 ໃກ້ຈະສໍາເລັດ ແລະ ເປີດນໍາໃຊ້ໃນໄວໆນີ້ຂປລ. ແຫລ່ງຂ່າວຈາກ ເມືອງທຸລະຄົມ ແຂວງວຽງຈັນ ໃຫ້ຮູ້ວ່າ: ຂົວນໍ້າພະນາຍ 3 ຕັ້ງຢູ່ບ້ານເກິນກາງ ເມືອງທຸລະຄົມ ແຂວງວຽງຈັນ ເສັ້ນທາງແຕ່ 3 ແຍກຄຸ້ມໝື່ນໝັ້ນ ລັດໄປໃສ່ທາງໜ້າທະນາຄານສົ່ງເສີມກະສິກໍາ ໜ່ວຍບໍລິການເມືອງທຸລະຄົມ ໂດຍຜ່ານທາງຫລັງຂອງສໍານັກງານປົກຄອງເມືອງ ໄດ້ເລີ່ມລົງມືກໍ່ສ້າງ ໃນວັນທີ 24 ກັນຍາ 2021 ເປັນຕົ້ນມາ ໂດຍແມ່ນ ບໍລິສັດ ຟ້າໃສ ການຊ່າງ ກໍ່ສ້າງຂົວທາງ ແລະ ເຄຫາສະຖານ ຈໍາກັດ ເປັນຜູ້ຮັບເໝົາກໍ່ສ້າງ, ເຊິ່ງມາຮອດປັດຈຸບັນ ການກໍ່ສ້້າງໃກ້ຈະສຳເລັດ ແລະ ຈະເປີດນຳໃຊ້ໃນໄວໆນີ້.

    ໃນວັນທີ 27 ຕຸລາ 2021 ນີ້, ທ່ານ ນາງ ວົງເດືອນ ວັດຕະໂສ ເຈົ້າເມືອງທຸລະ ຄົມ ພ້ອມຄະນະ ໄດ້ລົງຕິດຕາມຊຸກຍູ້, ກວດກາ ແລະ ໃຫ້ທິດຊີ້ນໍາຕໍ່ບໍລິສັດຮັບເໝົາກໍ່ສ້າງ ໂດຍໄດ້ຮັບຟັງການລາຍງານ ກ່ຽວກັບຄວາມຄືບໜ້າໃນການກໍ່ສ້າງຈາກ ທ່ານ ພົມມະສອນ ວົງໄຊ ປະທານບໍລິສັດ ຟ້າໃສ ການຊ່າງ ກໍ່ສ້າງຂົວທາງ ແລະ ເຄຫາສະຖານ ຈໍາກັດ ລວມເຖິງໜ້າວຽກທີ່ຍັງຄ້າງເລັກນ້ອຍອີກຈໍານວນໜຶ່ງ ທີ່ຈະຕ້ອງໄດ້ເລັ່ງລົງມືຈັດຕັ້ງປະຕິບັດໃຫ້ສໍາເລັດໂດຍໄວ ເປັນຕົ້ນ ວຽກອະນາໄມ, ທາສີ ແລະ ຄວາມຮຽບຮ້ອຍດ້ານ ອື່ນໆ, ຄາດວ່າການຈັດພິທີມອບ-ຮັບ ແລະ ເປີດນຳໃຊ້ ຈະມີຂຶ້ນໃນອີກບໍ່ດົນນີ້ ຕາມຄວາມພ້ອມຂອງການນໍາເມືອງ.

    ໂອກາດນີ້, ທ່ານ ນາງ ວົງເດືອນ ວັດຕະໂສ ກໍໄດ້ສະແດງຄວາມຍ້ອງຍໍຊົມເຊີຍຕໍ່ ທ່ານ ພົມມະສອນ ວົງໄຊ ທີ່ໄດ້ມີຄວາມຮັບຜິດຊອບສູງ ເອົາໃຈໃສ່ປະຕິບັດທຸກໜ້າວຽກຢ່າງເປັນເຈົ້າການ ຈົນເຮັດໃຫ້ວຽກງານສໍາເລັດຕາມເວລາທີ່ກໍານົດ ແລະ ສືບຕໍ່ປະຕິບັດວຽກຄ້າງຄາໃຫ້ສໍາເລັດໃນເວລາອັນຄວນ ເພື່ອໃຫ້ໄດ້ຈັດພິທີມອບຮັບ ແລະ ເປີດນໍາໃຊ້ຢ່າງເປັນທາງການ ໃນອີກບໍ່ດົນນີ້.

    ການກໍ່ສ້າງຂົວນໍ້າພະນາຍ 3 ນີ້, ເພື່ອຫລຸດຜ່ອນການສັນຈອນແອອັດ, ເຮັດໃຫ້ການເດີນທາງມີຄວາມສະດວກສະ ບາຍຂຶ້ນກວ່າເກົ່າ, ເປັນຂົວສໍາຮອງໃຊ້ສະເພາະລົດເບົາທີ່ນໍ້າໜັກບໍ່ເກີນ 8 ໂຕນ, ມີຮາວເຫລັກທັງສອງຂ້າງ ແລະ ຮາວກັ້ນລວງສູງ 3 ຈຸດ, ຄວາມຍາວ 33 ແມັດ, ກວ້າງ 4 ແມັດ, ເປັນຂົວເກົ່າທີ່ສະມັດຕະພາບຍັງໃຊ້ງານໄດ້ດີ, ໄດ້ຜ່ານການກວດກາເຕັກນິກມາດຖານ ແລະ ຄຸນນະພາບຈາກ ຂະແໜງໂຍທາທິການ ແລະ ຂົນສົ່ງ. ຂົວແຫ່ງນີ້ຈະກາຍເປັນຂົວອະນຸລັກຮູບແບບຂົວເບເລ່ ເປັນອະນຸສອນໄປອີກຍາວນານ.
    ຂ່າວ: ຫ້ອງການ ຖວທ ເມືອງທຸລະຄົມ

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.