ຈີນ ປະຕິຮູບການສຶກສາ ຍົກເລີກການສອບເສັງຊັ້ນ ປ 1

    0
    444

    ສຳນັກຂ່າວເອເອັຟພີ ລາຍງານໃນວັນທີ 30 ສິງຫາຜ່ານມາວ່າ ລັດຖະບານຈີນ ໄດ້ຍົກເລີກການສອບເສັງການຂຽນຕ່າງໆໃນຊັ້ນປະຖົມສຶກສາປີທີ 1 ເຊິ່ງມີເດັກນ້ອຍອາຍຸພຽງ 6 – 7 ປີ ໂດຍມາດຕະການດັ່ງກ່າວເປັນສ່ວນໜຶ່ງຂອງການປະຕິຮູບການສຶກສາທີ່ມີເປົ້າໝາຍຫຼຸດຄວາມກົດດັນໃຫ້ແກ່ເດັກນ້ອຍ ແລະ ຜູ້ປົກຄອງໃນ ສປ ຈີນ ທີ່ມີການແຂ່ງຂັນດ້ານການສຶກສາສູງ.

    ກ່ອນໜ້ານີ້ການສຶກສາຂອງ ສປ ຈີນ ເນັ້ນການສອບເສັງເປັນຫຼັກ ໂດຍກຳນົດໃຫ້ນັກຮຽນຕ້ອງສອບເສັງຕັ້ງແຕ່ຊັ້ນປະຖົມປີທີ 1 ຈົນຮອດມະຫາວິທະຍາໄລ ຫຼື ເອີ້ນວ່າ ການສອບເສັງກາວຂາວ ( Gaokao ) ເຊິ່ງມີຄວາມສຳຄັນເປັນຢ່າງຍິ່ງຕໍ່ເດັກນ້ອຍ ໂດຍສະເພາະປີສຸດທ້າຍຂອງສາຍສາມັນສຶກສາ ເຊິ່ງພຽງຄະແນນດຽວກໍສາມາດກຳນົດອະນາຄົດຂອງເດັກນ້ອຍໄດ້.

    ລັດຖະມົນຕີກະຊວງສຶກສາທິການ ສປ ຈີນ ກ່າວວ່າ: ການສອບເສັງຖີ່ເກີນໄປເຮັດໃຫ້ເດັກນ້ອຍຕ້ອງແບກຫາບພາລະຢ່າງໜັກໜ່ວງ ແລະ ຕ້ອງຕົກຢູ່ໃນຄວາມກົດດັນໃນການສອບເສັງ. ນອກຈາກນີ້, ການທີ່ເດັກນ້ອຍຕ້ອງພົບຄວາມກົດດັນຕັ້ງແຕ່ອາຍຸຍັງນ້ອຍ ຈະສົ່ງຜົນກະທົບຕໍ່ສຸຂະພາບຈິດໃຈ ແລະ ຮ່າງກາຍຂອງເດັກນ້ອຍ.

    ມາດຕະການໃໝ່ຂອງລະບົບການສຶກສາຈີນ ຍັງຈຳກັດການສອບເສັງຕ່າງໆຂອງການສຶກສາພາກບັງຄັບໃນຊັ້ນຮຽນອື່ນໆໃຫ້ເຫຼືອພຽງການສອບເສັງ 1 ຄັ້ງຕໍ່ພາກຮຽນ ໂດຍອະນຸຍາດໃຫ້ມີການສອບເສັງກາງພາກຮຽນ ແລະ ສອບເສັງແບບຈຳລອງໃນຊັ້ນມັດທະຍົມສຶກສາຕອນຕົ້ນໄດ້.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.